ஆந்திர முதலமைச்சர் ஜெகன் மோகன் ரெட்டியின் சகோதரி ஷர்மிளா கைது

தெலங்கானாவில் ஒய்எஸ்ஆர் தெலங்கானா பொதுக்கூட்டத்தில் ஆளும் பிஆர்எஸ் எம்எல்ஏ குறித்து அவதூறாக பேசியதாக, ஓய்எஸ் ஷர்மிளா கைது செய்யப்பட்டார்.

மகபூபாபாத்: ஆந்திர முதலமைச்சர் ஜெகன் மோகன் ரெட்டியின் சகோதரி ஓய்எஸ். ஷர்மிளா, கடந்த 2021ஆம் ஆண்டு "ஒய்எஸ்ஆர் தெலங்கானா" என்ற புதிய அரசியல் கட்சியைத் தொடங்கினார். தெலங்கானாவில் ஆட்சியைக் கைப்பற்ற வேண்டும் என்ற நோக்கத்தில் ஷர்மிளா தீவிரமாக செயல்பட்டு வருகிறார். ஆனால், அவரது நடவடிக்கைக்கு ஆளும் பாரத ராஷ்ட்ர சமிதி கட்சியினர் முட்டுக்கட்டை போட்டு வருகின்றனர்.

கடந்த ஆண்டு ஷர்மிளா, தெலங்கானா முழுவதும் பாத யாத்திரை மேற்கொண்டார். அப்போது போலீசாரால் கைது செய்யப்பட்டார். ஷர்மிளா கடந்த சில மாதங்களுக்கு முன்பு மீண்டும் தனது பாத யாத்திரையை தொடங்கினார். ஆனால், பாதயாத்திரைக்கு போலீசார் அனுமதி வழங்கவில்லை. இதனால் ஆளுங்கட்சிக்கு கண்டனம் தெரிவித்தும், பாத யாத்திரைக்கு அனுமதி கோரியும் ஷர்மிளா உண்ணாவிரதப் போராட்டம் நடத்தினார்.

இந்த நிலையில், நேற்றிரவு(பிப்.18) மகபூபாபாத் நகரில் ஒய்எஸ்ஆர் தெலங்கானா கட்சி சார்பில் பொதுக்கூட்டம் நடைபெற்றது. அப்போது ஒய்எஸ்ஆர் தெலங்கானாவின் கட்அவுட் மற்றும் பேனர்களை ஆளும் பாரத ராஷ்டிர சமிதி கட்சியினர் அகற்றியதாக தெரிகிறது. இதனால் இருதரப்பினரிடையே மோதல் ஏற்பட்டது.

இக்கூட்டத்தில் ஷர்மிளா, மகபூபாபாத் எம்எல்ஏ ஷங்கர் நாயக் குறித்து அவதூறாக பேசியதாக தெரிகிறது. இதற்கு கண்டனம் தெரிவித்த பிஆர்எஸ் கட்சியினர், கூட்டம் நடந்த இடத்திலேயே அமர்ந்து தர்ணா போராட்டத்தில் ஈடுபட்டனர். ஷர்மிளாவை கைது செய்ய வேண்டும் என்றும் அவர்கள் வலியுறுத்தினர்.

இதையடுத்து சம்பவ இடத்துக்கு சென்ற போலீசார் ஷர்மிளாவை கைது செய்து, ஹைதராபாத்திற்கு அழைத்துச் சென்றனர். எம்எல்ஏ ஷங்கர் நாயக்கிற்கு எதிராக அவதூறாக பேசியதாக, ஷர்மிளா மீது எஸ்சி- எஸ்டி வன்கொடுமை தடுப்புச் சட்டத்தின் கீழ் வழக்குப்பதிவு செய்யப்பட்டது.