தெற்கு 24 பர்கானாஸ் (மேற்கு வங்காளம்):கொல்கத்தாவில் இருந்து 50 கி.மீ தொலைவில் உள்ள டயமண்ட் ஹார்பர் மருத்துவக் கல்லூரி மருத்துவமனை மருத்துவர்கள் பிறப்பிலிருந்தே பிறப்புறுப்பு, கருப்பை இல்லாமல் வளர்ந்து வந்த 21 வயதான வங்காளதேச பெண்ணுக்கு அறுவை சிகிச்சை மூலம் செயற்கை பிறப்புறுப்பு, கருப்பை அமைத்து சாதனை படைத்துள்ளனர்.
இதுகுறித்து மூத்த மருத்துவர் ஒருவர் கூறுகையில்," அரிய வகை மருத்துவ காரணங்களால் அந்த பெண்ணுக்கு பிறப்பிலிருந்தே பிறப்புறுப்பு, கருப்பை இல்லை. இதனால் அவருக்கு அறுவை சிகிச்சை மூலம் செயற்கை பிறப்புறுப்பு, கருப்பை உருவாகப்பட்டுள்ளது. கடந்த ஓராண்டில் இங்கு மேற்கொண்ட நான்காவது அறுவை சிகிச்சை இதுவாகும். தற்போது அந்த பெண் நலமுடன் உள்ளார்" என்று தெரிவித்தார்.
தொடர்ந்து பேசிய அவர், "இந்த அறுவை சிகிச்சையின் பெயர் வெஜினோபிளாஸ்டி (Vaginoplasty). பிறப்புறுப்பு, கருப்பை உருவாக்குவது மற்றும் சீர் செய்வதற்காக மேற்கொள்ளப்படுவதாகும். இது ஒரு சிக்கலான அறுவை சிகிச்சை. பெண்கள் மற்றும் குழந்தைகள் நல மருத்துவர் சோமஜிதா சக்ரவர்த்தி தலைமையிலான மருத்துவர் குழு இந்த சிகிச்சையை வெற்றிகரமாக செய்தனர்" என்றார்.