பீகார்:ஓய்வு பெற்ற ஐ.பி.எஸ் அதிகாரி பி.கே.ரவி காங்கிரஸ் கட்சியில் இணைந்த நிலையில் வரவிருக்கும் 2024 தேர்தலில் இந்தியா கூட்டணி அரசாங்கத்தை அமைக்கும் என நம்பிக்கை தெரிவித்துள்ளார்.
தமிழ்நாடு கேடர் ஐபிஎஸ் ஆகவும், காவல்துறை இயக்குநராகவும் இருந்தவர் பி.கே.ரவி. இவர் தற்போது பணியில் இருந்து ஓய்வு பெற்ற நிலையில் காங்கிரஸ் கட்சியில் இணைந்துள்ளார். காங்கிரஸின் சித்தாந்தத்தால் ஈர்க்கப்பட்டதாக செய்தியாளர்களிடம் கூறிய பி.கே.ரவி தனது சொந்த மாநிலமான பீகாரில் இருந்து பணியாற்ற விரும்புவதாக கூறியுள்ளார்.
மேலும் இது குறித்து அவர் கூறுகையில், "தான் காங்கிரஸின் சித்தாந்தத்தால் மிகவும் ஈர்க்கப்பட்டதால் அந்த கட்சியில் சேர்ந்தேன். பீகார் எனது சொந்த ஊர், நான் என் சொந்த மாநிலத்திற்காக வேலை செய்ய விரும்புகிறேன். மேலும் மத்திய அரசு பொய்களால் மட்டுமே உருவாக்கப்பட்டுள்ளது" என அவர் கூறியுள்ளார்.
வரும் நாடாளுமன்ற மக்களவை தேர்தலில் போட்டியிடுவது குறித்து எழுப்பிய கேள்விக்கு பதிலளித்த அவர், "தேர்தலில் போட்டியிட விரும்புகிறேன். ஆனால் அதை கட்சி மேலிடம் தான் முடிவு செய்ய வேண்டும். குறிப்பாக தனது சொந்த தொகுதியான சமஸ்திபூர் தொகுதியில் களமிறங்கினால் சிறப்பாக இருக்கும் என்று எண்ணுகிறேன். ஒருவேளை கட்சி மேலிடம் வேறு ஏதேனும் தொகுதியை ஒதுக்கினால் அங்கும் களமிறங்க தயாராக இருக்கிறேன்" என்றார்.