அரசியல் பரபரப்புகளுக்கு மத்தியில், உத்தரப் பிரதேச மாநிலத்தின் முதலமைச்சர் யோகி ஆதித்யநாத் தலைநகர் டெல்லிக்கு இரண்டு நாள் பயணம் மேற்கொண்டுள்ளார். நேற்று (ஜூன்.10) ஒன்றிய உள்துறை அமைச்சர் அமித் ஷாவை சந்தித்த அவர், இன்று (ஜூன்.11) பிரதமர் நரேந்திர மோடியை அவரது இல்லத்தில் சந்தித்தார்.
உ.பி. பாஜகவில் புகைச்சல்
கடந்த சில மாதங்களாகவே உத்தரப் பிரதேச பாஜகவில் குழப்பமான சூழல் நிலவி வருகிறது. உத்தரப் பிரதேச அரசு, கோவிட்-19 தொற்றை கையாண்ட விதம் பெரும் விமர்சனத்தை சந்தித்து வருகிறது. உயிரிழந்த உடல்கள் நதிகளில் மிதக்கும் புகைப்படங்கள் சர்வதேச ஊடகங்களில் விவாதிக்கப்பட்டு மாநில அரசுக்கு பெரும் அவப்பெயரை ஏற்படுத்தியது.
ஆற்றுப்படுகையில் சடலங்கள் மேலும், அன்மையில் நடந்து முடிந்த உள்ளாட்சித் தேர்தலில் பாஜகவை பின்னுக்குத் தள்ளி அகிலேஷ் யாதவின் சமாஜ்வாதி கட்சி முதலிடத்தை பெற்றது. இதுபோன்ற தொடர் பின்னடவை சந்தித்துள்ள உத்தரப் பிரதேச பாஜக மீது கட்சி மேலிடம் பெரும் அதிருப்தியில் உள்ளதாகக் கூறப்படுகிறது.
அடுத்த ஆண்டு சட்டப்பேரவைத் தேர்தலை உத்தரப் பிரதேசம் சந்திக்கவுள்ள நிலையில், மாநில பாஜக முக்கிய மாற்றங்களை சந்திக்கவுள்ளதாகத் தெரிகிறது. அதேவேளை, முதலமைச்சர் யோகி ஆதித்யநாத்தும் தன் பங்கிற்கு, வளைந்து கொடுக்கமல் தனது இமேஜை தக்கவைக்க முயற்சி செய்துவருகிறார்.
விரைவில் முக்கிய மாற்றங்கள்
அன்மையில் உத்தரப் பிரதேசத்தைச் சேர்ந்த மூத்த காங்கிரஸ் தலைவர் ஜிதன் பிரசாதா அக்கட்சியிலிருந்து விலகி பாஜகவில் சேர்ந்தார். இவருக்கு மாநில பாஜகவில் எத்தகைய முக்கியத்துவம் தரப்படும் என்ற எதிர்பார்ப்பு எழுந்துள்ளது.
பாஜகவில் சேர்ந்த ஜிதன் பிரசாதா இந்த பின்னணியில்தான் யோகி ஆதித்யநாத்தின் டெல்லிப் பயணம், பிரதமருடனான சந்திப்பு ஆகியவை முக்கியத்துவம் வாய்ந்தவையாகப் பார்க்கப்படுகிறது. இச்சந்திப்புக்குப் பின் யோகி அமைச்சரவையில் முக்கிய மாற்றங்கள் ஏற்படலாம் என அரசியல் வட்டாரங்கள் தெரிவிக்கின்றன.
இதையும் படிங்க:’பிரதமர் மோடிதான் டாப் தலைவர்’ - சிவசேனா சஞ்சய் ராவத்
