கரோனா: இந்தியாவுக்கு ஆக்சிஜன் அனுப்பும் இங்கிலாந்து!

கரோனாவுக்கு எதிரான இந்தியாவின் போராட்டத்திற்கு ஆதரவாக மூன்று ஆக்சிஜன் உற்பத்தி கருவிகளை அனுப்ப இங்கிலாந்து முடிவு செய்துள்ளது.

கரோனா இரண்டாவது அலையால் நோயாளிகளுக்கு சிகிச்சையளிக்க ஆக்சிஜன் கிடைக்காமல் இந்திய மருத்துவமனைகள் திணறிக் கொண்டிருக்கின்றன. பல மாநிலங்களில் சுகாதாரக் கட்டமைப்பு முடங்கிப்போகும் நிலை ஏற்பட்டிருக்கிறது. மாநில அரசுகள் மத்திய அரசிடம் உதவி கோரிவருகின்றன. இப்படியொரு கடினமான தருணத்தில் சில நாடுகள் இந்தியாவுக்கு ஆக்சிஜனையும், பிற மருத்துவ உபகரணங்களையும் அனுப்பியிருக்கின்றன.

கரோனா தொற்றின் இரண்டாவது அலையின் தாக்கத்தின் கீழ் இந்தியா தத்தளிக்கிறது. கடந்த 24 மணி நேரத்தில் 3.60 லட்சமாக பாதிக்கப்பட்டோரின் எண்ணிக்கை அதிகரித்துள்ளது. மேலும் 3,293 தொடர்புடைய இறப்புகள் நாட்டில் பதிவாகியுள்ளன.

இந்தியாவை ஆதரிப்பதற்கான தனது நடவடிக்கையை இங்கிலாந்து சமீபத்தில் அறிவித்தது. அதையடுத்து 495 ஆக்சிஜன் செறிவூட்டிகளும், 200 வென்டிலேட்டர்களும் அனுப்பப்பட்டன. இங்கிலாந்திலிருந்து இந்த மருத்துவப் பொருள்களின் முதல் தொகுதி செவ்வாய்க்கிழமை (ஏப். 27) டெல்லிக்கு வந்துள்ளது. மீதமுள்ளவை வெள்ளிக்கிழமைக்குள் டெல்லிக்கு வரவுள்ளன.

மேலும், கரோனாவிற்கு எதிரான போராட்டத்தில் பிரிட்டன் இந்திய 'நண்பர்கள்' உடன் நிற்கிறது என்று இங்கிலாந்து வெளியுறவு செயலாளர் டொமினிக் ராப் தெரிவித்தார்.

இந்நிலையில், நேற்று (ஏப். 28) இங்கிலாந்து உயர் ஆணையம் அறிக்கை ஒன்றை வெளியிட்டிருந்தது. அதில், 'ஆக்சிஜன் இந்தியாவின் சுகாதார அமைப்பின் முக்கிய தேவைகளில் ஒன்றாகும். இந்தியாவை ஆதரிக்க, கரோனா நோயால் பாதிக்கப்பட்டவர்களுக்கு அதிக ஆக்சிஜனை வழங்க வடக்கு அயர்லாந்தில் உள்ள உபரி பங்குகளிலிருந்து மூன்று ஆக்சிஜன் உற்பத்தி அலகுகள் அனுப்பப்படும்.

ஆக்சிஜன் அலகுகள் ஒவ்வொன்றும் நிமிடத்திற்கு 500 லிட்டர் ஆக்சிஜனை உற்பத்திசெய்யும் திறன் கொண்டவை. ஒரே நேரத்தில் 50 பேர் பயன்படுத்த போதுமானது.' எனத் தெரிவித்துள்ளது.