ஆந்திர ஆட்டோ மீது மின்சாரம் பாய்ந்ததற்கு காரணம் அணில் - மின்சாரத்துறை விளக்கம்

ஆந்திர மாநிலத்தில் ஆட்டோ மீது மின் கம்பி விழுந்து 5 பேர் உடல் கருகி உயிரிழந்த விபத்திற்கு அணில் தான் காரணம் என மின்சாரத் துறையினர் தெரிவித்துள்ளனர்.

ஆந்திரா:ஆந்திராவின் சத்யசாய் மாவட்டத்தில் தாடிமரி மண்டல் சில்லகொண்டய்யபள்ளி என்ற இடத்தில் நேற்று(ஜூன்30) ஆட்டோ மீது மின் கம்பி விழுந்து விபத்து ஏற்பட்டது. இதில் 5 பேர் உடல் கருகி உயிரிழந்தனர். விவசாய பணிகளுக்கு சென்று கொண்டிருந்த போது இந்த சம்பவம் நடந்துள்ளது. இவர்கள் அனைவரும் கூடம்பள்ளியில் இருந்து சில்லகொண்டய்யப்பள்ளிக்கு சென்று கொண்டிருந்தனர்.

சம்பவத்தின் போது ஆட்டோவில் டிரைவருடன் 13 பேர் இருந்துள்ளனர். அதில் டிரைவர் பொத்துலய்யா மற்றும் 7 பேர் பலத்த காயம் அடைந்தனர். மின் அழுத்த கம்பி விழுந்ததும் உடனே ஓட்டுனர் ஆட்டோவை ஓரமாக நிறுத்தியுள்ளார். இருப்பினும் ஆட்டோ தீப்பிடித்து எரிய ஆரம்பித்தது. ஆட்டோ ரெக்சின் கவரால் மூடப்பட்டிருந்ததால் உடனடியாக தீ பரவியது.

இது குறித்து விளக்கமளித்த ஆந்திர பிரதேசத்தின் தெற்கு மின்பகிர்மான நிறுவனத்தின் தலைவர் ஹரநாதராவ் கூறுகையில், ‘மின்கம்பியில் இருந்து மின்கம்பத்தில் இருந்த இரும்பு இடுக்கில் அணில் ஒன்று குதித்ததால் எதிர்பாராத விதமாக கம்பி ஆட்டோவின் மீது உரசியதாக தெரிவித்தார்.இதனால் ஆட்டோவில் மின்சாரம் பாய்ந்ததாகவும் அவர் கூறியுள்ளார்.

இதையும் படிங்க:ஆந்திராவில் சோகம்- ஆட்டோ மீது மின்கம்பி விழுந்ததில் 5 பேர் உடல் கருகி பலி