தெலங்கானா பட்ஜெட் விவகாரம் : ஆளுநர் தமிழிசை, முதலமைச்சர் கேசிஆர் இடையே உடன்பாடு!

தெலங்கானா மாநில பட்ஜெட் தொடர்பாக ஆளுநர் மற்றும் முதலமைச்சர் சந்திரசேகர ராவ் இடையே நீடித்துவந்த மோதல் முடிவுக்கு வந்தது. இதையடுத்து வரும் 3ஆம் தேதி பட்ஜெட் தாக்கல் செய்யப்படும் எனவும்; அதில் ஆளுநர் தமிழிசையின் உரை இடம்பெறும் எனவும் தெரிகிறது.

தெலங்கானா: தெலங்கானாவில் மாநில அரசுக்கும், ஆளுநர் தமிழிசைக்கும் இடையே மோதல் போக்கு நீடித்து வருகிறது. ஆளுநர் தமிழிசை தங்களது நிர்வாகத்தில் தலையீடு செய்வதாக முதலமைச்சர் சந்திரசேகர ராவ் குற்றம்சாட்டி வருகிறார். கடந்த சில நாட்களுக்கு முன்பு ஆளுநர் மாளிகையில் நடைபெற்ற குடியரசு தின விழாவில் முதலமைச்சர் கேசிஆர் கலந்து கொள்ளவில்லை. இதற்கு ஆளுநர் தமிழிசை கடும் கண்டனம் தெரிவித்திருந்தார்.

இந்த நிலையில், தெலங்கானாவில் 2023-24ஆம் நிதியாண்டுக்கான பட்ஜெட்டை வரும் 3ஆம் தேதி தாக்கல் செய்ய மாநில அரசு முடிவு செய்தது. அதன்படி, பட்ஜெட் தயாரிக்கப்பட்டு ஆளுநரின் ஒப்புதலுக்காக அனுப்பி வைக்கப்பட்டது. ஆனால், பட்ஜெட்டுக்கு அவர் இதுவரை ஒப்புதல் அளிக்கவில்லை. அதேநேரம் பட்ஜெட் கூட்டத்தொடரில் ஆளுநர் உரையாற்றுவதற்கான ஏற்பாடுகள் செய்யப்பட்டுள்ளதா? என்பது தொடர்பாக மாநில அரசுக்கு ஆளுநர் மாளிகை கடிதம் எழுதியது.

பட்ஜெட் தாக்கலுக்கு இன்னும் ஒரு சில நாட்களே உள்ளதால், இந்த விவகாரம் தொடர்பாக தெலங்கானா அரசு நீதிமன்றத்தை நாடியது. பட்ஜெட்டுக்கு ஒப்புதல் அளிக்கும்படி ஆளுநருக்கு உத்தரவிட வேண்டும் என தெலங்கானா அரசு தரப்பில் உயர் நீதிமன்றத்தில் மனுதாக்கல் செய்யப்பட்டது.

இந்த மனு விசாரணைக்கு வந்தபோது, சட்டசபையில் ஆளுநர் உரைக்கு அரசு ஒப்புக்கொண்டதாக தெலங்கானா அரசுத் தரப்பு வழக்கறிஞர் துஷ்யந்த் தெரிவித்தார். பட்ஜெட்டை தாக்கல் செய்ய ஆளுநர் அனுமதி அளிப்பார் என ஆளுநர் மாளிகை வழக்கறிஞர் அசோக் ஆனந்த் தெரிவித்தார்.

இருதரப்பு வாதங்களையும் பதிவு செய்த நீதிமன்றம், மனுவை வாபஸ் பெற அறிவுறுத்தியது. அதன்படி, தெலங்கானா அரசு மனுவை வாபஸ் பெற்றது. இதையடுத்து பட்ஜெட் தொடர்பாக ஆளுநர் மற்றும் கேசிஆர் இடையில் நீடித்துவந்த மோதல் முடிவுக்கு வந்துள்ளது. திட்டமிட்டபடி தெலங்கானா பட்ஜெட் தொடர் வரும் 3ஆம் தேதி ஆளுநர் உரையுடன் தொடங்கவுள்ளது.