Maharashtra: சரத் பவார், சஞ்சய் ராவத் எம்.பிக்கு கொலை மிரட்டல்!

சமூக வலைதளங்கள் மூலம் தேசியவாத காங்கிரஸ் கட்சித் தலைவர் சரத் பவாருக்கு கொலை மிரட்டல் விடுக்கப்படுவதாக சரத் பவாரின் மகளும், எம்.பியுமான சுப்ரியா சுலே மும்பை போலீஸ் கமிஷனர் விவேக் பன்சல்கரிடம் புகார் அளித்து உள்ளார்.

மும்பை (மகாராஷ்டிரா):தேசியவாத காங்கிரஸ் கட்சித் தலைவர் சரத் பவார், சிவசேனா கட்சியின் உத்தவ் தாக்ரே அணி ராஜ்ய சபா எம்பி சஞ்சய் ராவத் ஆகியோருக்கு கொலை மிரட்டல் விடுக்கப்பட்டதை அடுத்து போலீசார் விசாரணை நடத்தி வருகின்றனர்.

தேசியவாத காங்கிரஸ் கட்சியின் பாராமதி தொகுதி எம்.பியும், சரத் பவாரின் மகளுமான சுப்ரியா சுலேவின் வாட்ஸ் அப் எண்ணிற்கு, அவரது தந்தைக்கு கொலை மிரட்டல் விடுத்து செய்தி ஒன்று வந்ததாக தெரிவித்து உள்ளார். மேலும் சுப்ரியா சுலே, தனது வாட்ஸ் அப் எண்ணிற்கு வந்த கொலை மிரட்டல் செய்தி உடன் மும்பை போலீஸ் கமிஷனர் விவேக் பன்சல்கரிடம், தன் தந்தைக்கு கொலை மிரட்டல் விடுத்தவர்கள் மீது நடவடிக்கை எடுக்கக்கோரி புகார் அளித்து உள்ளார்.

சரத்பவாருக்கு கொலை மிரட்டல் விடுக்கப்பட்டது சம்பந்தமாக கமிஷனரிடம் முறையிட்ட சுப்ரியா சுலே

மேலும், சரத் பவாருக்கு கொலை மிரட்டல் விடுக்கப்பட்ட சம்பவம் குறித்து மகாராஷ்டிரா உள்துறைக்கு பொறுப்பு வகிக்கும் துணை முதலமைச்சர் தேவேந்திர பட்னாவிஸ், மத்திய உள்துறை அமைச்சர் அமித்ஷா ஆகியோர் கவனிக்க வேண்டும் என சுப்ரியா சுலே வலியுறுத்தி உள்ளார்.

இந்நிலையில், மும்பையில் உள்ள தெற்கு சைபர் காவல் நிலையத்தில் இது தொடர்பாக முதல் தகவல் அறிக்கை (FIR) பதிவு செய்யும் பணியில் ஈடுபட்டுள்ளதாக மும்பை காவல்துறை அதிகாரிகள் தெரிவித்தனர். மத்தியிலும், மகாராஷ்டிர அரசிலும் பல பதவிகளை வகித்த சரத் பவாருக்கு கடந்த காலங்களிலும் கொலை மிரட்டல்கள் வந்துள்ளது குறிப்பிடத்தக்கது.

இதேபோல், சிவசேனாவின் உத்தவ் தாக்ரே அணி எம்பி சஞ்சய் ராவத், அவரது சகோதரர் சுனில் ராவத் ஆகியோருக்கும் நேற்று கொலை மிரட்டல் விடுக்கப்பட்டு உள்ளது. சுனில் ராவத்தின் செல்போனுக்கு வந்த ஒரு அழைப்பின் மூலமாக வந்த இந்த கொலை மிரட்டல் விடுக்கப்பட்டுள்ளது.

இது குறித்து சஞ்சய் ராவத்தின் சகோதரர் சுனில் ராவத், “நேற்றிலிருந்து எனக்கும், என் சகோதரர் சஞ்சய் ராவத்துக்கும் கொலை மிரட்டல் வந்துகொண்டிருக்கிறது. ‘சஞ்சய் ராவத் காலையில் பத்திரிகையாளர்களைச் சந்திப்பதை நிறுத்த வேண்டும். அப்படி நிறுத்தவில்லையெனில், ஒரு மாதத்துக்குள் சகோதரர்கள் இரண்டு பேரையும் சுட்டுக் கொலைசெய்து, மயானத்துக்கு அனுப்பிவைப்போம்’ என்று மிரட்டியதாக தெரிவித்தார்.

சஞ்சய் ராவத், அவரது சகோதரர் சுனில் ராவத்

மேலும், இது குறித்து மும்பை போலீஸ் கமிஷனருக்கும், உள்துறை அமைச்சருக்கும் புகார் தெரிவிக்கப்பட்டிருப்பதாகவும் சுனில் ராவத் தெரிவித்தார். எம்.பி சஞ்சய் ராவத் தினமும் காலையில் பத்திரிகையாளர்களைச் சந்திப்பதை வழக்கமாகக் கொண்டிருக்கிறார். இந்த நிலையில் தான் அவர் இந்தப் பத்திரிகையாளர் சந்திப்பை நிறுத்த வேண்டும் என்று கொலை மிரட்டல் விடுக்கப்பட்டிருக்கிறது.