Operation Ganga: 160 இந்தியர்களுடன் சிறப்பு விமானம் டெல்லி வருகை

ஹங்கேரியிலிருந்து 160 இந்தியர்களுடன் புறப்பட்ட ஏர் ஆசியா விமானம் டெல்லியிலுள்ள இந்திரா காந்தி பன்னாட்டு விமான நிலையம் வந்தடைந்தது.

டெல்லி: உக்ரைன் நாட்டிலிருந்து மீட்கப்பட்ட மேலும் 160 இந்தியர்கள் இன்று (மார்ச் 7) காலை நான்கு மணியளவில் ஏர் ஆசியா விமானம் மூலமாக வந்தடைந்தனர்.

மீட்கப்பட்டவர்களில் ஹரிஷ்மா என்னும் பெங்களூருவைச் சேர்ந்த மாணவர் கூறுகையில், “இது மிகவும் கடினமான நேரம். மெட்ரோ சுரங்கப்பாதை வழியாக மூன்று நாள்கள் பயணம் செய்தோம். உக்ரைன் நாட்டு எல்லையை வந்தடைந்ததும் இந்திய தூதரகத்தினர் எங்களை மீட்டு வந்தனர். உணவு, குடிநீர் போன்ற அத்தியாவசிய தேவைகளை அவர்களே எங்களுக்கு வழங்கினர். இந்தியா வந்தடைந்ததில் மகிழ்ச்சி அடைகிறேன்” என்று தெரிவித்தார்.

கோவர்தன் என்னும் மாணவர் கூறுகையில், “உக்ரைன் எல்லையை கடந்த பின்பு இந்திய தூதரகம் எங்களுக்கு தேவையான அனைத்தையும் செய்து கொடுத்தனர். எங்களை பாதுகாப்பாக மீட்டதற்கு இந்திய தூதரகத்திற்கு நன்றி தெரிவித்துக் கொள்கிறேன்” என கூறினார்.

உக்ரைனின் இந்திய தூதரகம் கூறுகையில், அனைத்து இந்தியர்களையும் பாதுகாப்பாக மீட்பதற்கான நடவடிக்கை மேற்கொள்ளப்பட்டு வருகிறது எனவும் சுமி பகுதியில் இருக்கும் மக்கள் இன்னும் சிறிது நேரத்திற்கு காத்திருக்க கேட்டுக்கொள்ளப்படுவதாகவும் தெரிவித்துள்ளனர்.

ஆப்ரேஷன் கங்கா (Operation Ganga) மூலம் கடந்த வாரத்தில் 10,000க்கும் மேற்பட்ட இந்திய மாணவர்கள் மீட்கப்பட்டனர். உக்ரைனின் அனைத்து பகுதிகளில் இருக்கும் இந்தியர்களும் விரைவில் மீட்கப்படுவர் எனவும் இந்திய தூதரகம் தெரிவித்துள்ளது.

தொடர் ஷெல் தாக்குதல், தரைவழித் தாக்குதலிலும் பிசோச்சின் பகுதியில் உணவு மற்றும் குடிநீர் விநியோகிக்கப்பட்டு வருவதாக இந்திய தூதரகம் தெரிவித்துள்ளது.

இதையும் படிங்க:இந்திய மாணவர்களை வெளியேற்ற 130 பேருந்துகள் ஏற்பாடு - ரஷ்ய ராணுவம்