40 நாள்களில் மட்டுமே படித்து என்டிஏ தேர்வில் நாட்டிலேயே முதலிடம் பிடித்த ஹரியானா மாணவி!

தேசிய பாதுகாப்பு அகாடமியில் பெண்கள் சேர்வதற்காக நடத்தப்பட்ட என்டிஏ தேர்வில், ஹரியானாவைச் சேர்ந்த மாணவி நாட்டிலேயே முதலிடம் பிடித்துள்ளார்.

ஹரியானா: உச்ச நீதிமன்ற உத்தரவுப்படி தேசிய பாதுகாப்பு அகாடமியில் (NDA) பெண்களும் சேர மத்திய அரசு கடந்த ஆண்டு அனுமதி அளித்தது. அதன்படி தேசிய பாதுகாப்பு அகாடமியில் பெண்கள் சேர்வதற்கான தேர்வு, கடந்த ஆண்டு நவம்பர் 21ஆம் தேதி நடைபெற்றது. இந்த தேர்வு முடிவுகள் வெளியாகியுள்ளன.

அதில், ஹரியானா மாநிலம், ரோஹ்தாக் மாவட்டத்தைச் சேர்ந்த ஷனான் டாக்கா என்ற மாணவி நாட்டிலேயே முதலிடம் பிடித்துள்ளார். ஷனான் டாக்காவின் தந்தையும், தாத்தாவும் இந்திய ராணுவத்தில் சேவையாற்றியதாகவும், அவர்களது சேவையால் ஈர்க்கப்பட்ட ஷனானும் ராணுவத்தில் சேர வேண்டும் என்ற முனைப்புடன் இந்தத் தேர்வை எழுதியதாகவும் தெரிகிறது. ஷனான் தனது பள்ளிப்படிப்பை ராணுவப்பள்ளிகளில் முடித்துள்ளார். டெல்லி பல்கலைக்கழகத்தில் பட்டப்படிப்பை முடித்துள்ளார்.

இதுகுறித்து ஷனான் டாக்கா கூறியபோது, "தேர்வுக்குத் தயாராக எங்களுக்கு 40 நாள்கள் மட்டுமே இருந்தது. இந்த குறுகிய காலகட்டத்தில்தான் படித்தோம். நான் என்டிஏ தேர்வின் பழைய கேள்வித்தாள்களை வைத்து பயிற்சி செய்தேன். தேர்வுக்குப் பிறகு நேர்காணலும் நடைபெற்றது. இந்த தேர்வில் வெற்றி பெற்றது எனக்கு மிகவும் நம்பிக்கை தந்துள்ளது" என்றும் தெரிவித்தார்.