டெல்லி: இளநிலை மருத்துவ படிப்பிற்கான நீட் தேர்வு கடந்த செப்டம்பர் 12ஆம் தேதி நடைபெற்றது. நாடு முழுவதும் உள்ள 202 நகரங்களில் 3,682 தேர்வு மையங்களில் சுமார் 16 லட்சத்து 14 ஆயிரத்து 777 மாணவர்கள் இந்தத் தேர்வை எழுதினர்.
இதில், மகாராஷ்டிராவில் உள்ள தேர்வு மையம் ஒன்றில் வைஷ்ணவி போபாலி, அபிஷேக் சிவாஜி ஆகிய இரு மாணவர்களின் வினாத்தாள்கள், ஓஎம்ஆர் தாள்கள் இரண்டும் மாறியுள்ளன.
குளறுபடியால் தடை
இந்தக் குளறுபடியை எதிர்த்து இரு மாணவர்களின் தரப்பில் இருந்தும் மும்பை உயர் நீதிமன்றத்தில் வழக்கு தொடர்ந்தனர். அந்த வழக்கை விசாரித்த நீதிபதிகள் ஏற்பட்ட குளறுபடிக்கு பதிலீடாக இருவருக்கும் தனித்தேர்வு நடத்த வேண்டும் எனவும் அதுவரை நீட் தேர்வு முடிவுகளை வெளியிடக் கூடாது என அக். 20ஆம் தேதி உத்தரவிட்டது.
தற்போது, தேர்வு முடிந்து ஏறத்தாழ 45 நாள்கள் நிறைவடைந்த நிலையில், நாடு முழுவதும் மாணவர்கள் தேர்வு முடிவுகளை எதிர்பார்த்து காத்திருக்கும் சூழல் ஏற்பட்டுள்ளது.