மும்பை: மஹாராஷ்டிராவின் மும்பையில் பத்ராசால் குடியிருப்புப் பகுதியை மாற்றி அமைப்பதில் நில முறைகேடு செய்ததாக தொடரப்பட்ட வழக்கில் சிவசேனா எம்பி சஞ்சய் ராவத்துக்கு மும்பை சிறப்பு நீதிமன்றம் ஜாமீன் வழங்கியது.
பத்ரா சால் (வரிசை குடியிருப்பு) மறுமேம்பாடு தொடர்பாக நிதி முறைகேடுகளில் ஈடுபட்டதாக ராஜ்யசபா உறுப்பினர் சஞ்சய் ராவத்தை கடந்த ஜூலை மாதம் அமலாக்க துறை(ED) கைது செய்தது. தற்போது நீதிமன்ற காவலில் உள்ள அவர் மும்பை ஆர்தர் ரோடு சிறையில் அடைக்கப்பட்டுள்ளார்.
இந்நிலையில், சஞ்சய் ராவத் ஜாமீன் கோரி நீதிமன்றத்தில் மனுதாக்கல் செய்திருந்தார். அந்த மனுவில் தனக்கு எதிரான வழக்கு "அதிகார துஷ்பிரயோகம்" மற்றும் "அரசியல் பழிவாங்கல்" ஆகியவற்றுக்கு சரியான உதாரணம் என்று கூறியிருந்தார்.