சாக்கி நாகவில் கொடூரம்: பாலியல் வன்புணர்வுக்கு ஆளான பெண் உயிரிழப்பு

மும்பை சாக்கி நாக பகுதியில் கொடூரமான முறையில் பாலியல் வன்புணர்வுக்கு ஆளான பெண் மருத்துவம் பலனின்றி இன்று உயிரிழந்தார்.

மகாராஷ்டிரா: மும்பை புறநகர்ப் பகுதியான சாக்கி நாக (Sakinaka) பகுதியில் 30 வயதான பெண் ஒருவர் ரத்தக் காயங்களுடன் உயிருக்குப் போராடுவதாக செப்டம்பர் 9ஆம் தேதி அதிகாலை 3 மணியளவில் காவல் துறைக்குத் தகவல் கிடைத்தது.

தகவலின்பேரில், சம்பவ இடத்திற்கு விரைந்த காவல் துறையினர், அப்பெண்ணை மீட்டு மருத்துவமனையில் அனுமதித்தனர். முதற்கட்ட விசாரணையில், அப்பெண் பாலியல் வன்புணர்வுக்கு உள்ளாக்கப்பட்டு இரும்புத் தடியால் பிறப்புறுப்பு உள்ளிட்ட பாகங்களில் கொடூரமாகத் தாக்கியிருப்பது தெரியவந்தது.

மேலும், அப்பெண்ணைக் கண்டெடுத்த பகுதி அருகே நின்றுகொண்டிருந்த டெம்போ வாகனத்தைக் காவல் துறையினர் சோதனையிட்டனர். அப்போது, அதற்குள் ரத்தக் கறைகள் இருப்பது தெரியவந்தது.

சம்பவம் நடந்த சில மணி நேரங்களிலேயே இச்சம்பவத்தில் குற்றஞ்சாட்டப்பட்ட மோகன் செளகான் (45) என்பவர் கைதுசெய்யப்பட்டுள்ளதாக காவல் துறைத் தரப்பில் தெரிவிக்கப்பட்டுள்ளது.

இதற்கிடையில், ராஜவாடி மருத்துவமனையில் கடந்த 33 மணி நேரமாக உயிருக்குப் போராடிக்கொண்டிருந்த அப்பெண், மருத்துவம் பலனின்றி உயிரிழந்துவிட்டதாக அதிகாரப்பூர்வ தகவல் வெளியாகியுள்ளது.

இச்சம்பவத்தில் வேறு சிலருக்குத் தொடர்பு இருக்கலாம் என்ற கோணத்தில் காவல் துறையினர் விசாரணையைத் துரிதப்படுத்தியுள்ளனர்.

2012ஆம் ஆண்டு ஓடும் பேருந்தில் மருத்துவ மாணவி ஐந்து பேர் கொண்ட கும்பலால் கூட்டுப் பாலியல் வன்கொடுமைக்கு உள்ளாக்கப்பட்ட சம்பவம் நாட்டையே உலுக்கியது என்பது குறிப்பிடத்தக்கது.

இதையும் படிங்க:மகளைக் காதலித்த இளைஞரைக் கொன்ற தந்தை உள்பட நால்வர் கைது