Raigad landslide: நிலச்சரிவில் சிக்கி 16 பேர் உயிரிழப்பு - தேடுதல் வேட்டை தீவிரம்!

மகாராஷ்டிரா மாநிலம் ராய்காட் மாவட்டத்தில் உள்ள இர்ஷல்வாடி மலை கிராமத்தில், நேற்றைய முன்தினம் இரவில் நிகழ்ந்த நிலச்சரிவில், இதுவரை 16 பேரின் உடல்கள் மீட்கப்பட்டு உள்ளதாக தெரிவிக்கப்பட்டுள்ளது.

ராய்காட்: மகாராஷ்டிராவின் ராய்காட் மாவட்டத்தில் உள்ள இர்ஷால்வாடி மலை கிராமத்தில் நிகழ்ந்த நிலச்சரிவில், இதுவரை 16 பேரின் உடல்களை தேசிய பேரிடர் மீட்புப் படை (NDRF) மீட்டு உள்ளதாக தெரிவித்து உள்ளது. இந்த நிலச்சரிவில் சிக்கி பல வீடுகள் புதையுண்டு உள்ளதாக அதிகாரி ஒருவர் தெரிவித்து உள்ளார்.

கலப்பூர் தாலுகாவிற்கு உட்பட்ட மலைச் சரிவு பகுதியில் அமைந்துள்ள இந்த கிராமத்தில் மீட்புப் பணிகளை தேசிய பேரிடர் மீட்புப் படை மீண்டும் தொடங்கி உள்ளது. நிலச்சரிவு சம்பவம் நிகழ்ந்து உள்ள கிராமத்தில், 228 பேர் வசிப்பதாக தகவல் வெளிவந்து உள்ள நிலையில், 16 பேரின் உடல்கள் தற்போது வரை மீட்கப்பட்டு உள்ளன.

இருப்பினும், மொத்தம் 119 பேர் இன்னும் கண்டுபிடிக்கப்படவில்லை என்று அதிகாரிகள் தெரிவித்து உள்ளனர். அவர்களில் திருமணத்திற்கு அல்லது நெல் தோட்ட வேலைக்காக கிராமத்தை விட்டு வெளியே சென்றவர்களும் அடங்குவர். இர்ஷல்வாடி கிராமத்தில் ஏற்பட்ட நிலச்சரிவில், அங்கு உள்ள கிட்டத்தட்ட 50 வீடுகளில் 17 வீடுகள் முற்றிலுமாக தரையில் புதையுண்டு உள்ளது குறிப்பிடத்தக்கது.

நிலச்சரிவு ஏற்பட்ட பகுதியில், குறைந்தபட்சம் நான்கு தேசிய பேரிடர் மீட்புப் படை குழுக்கள், மீட்பு நடவடிக்கைகளைத் தொடங்கி உள்ளன. குறிப்பாக, தானே பேரிடர் மீட்புப் படை (TDRF), உள்ளூர் பேரிடர் மேலாண்மை அதிகாரிகள் மற்றும் ராய்காட் காவல் துறையினரும் இந்த மீட்புப் பணிகளில் ஈடுபட்டு வருகின்றனர்.

மலை அடிவாரத்தில் இருந்து நிலச்சரிவால் பாதிக்கப்பட்ட இர்ஷல்வாடி கிராமத்தை அடைய சரியான சாலை வசதி இல்லாததால், ஒன்றரை மணிநேரத்திற்கு மேல் ஆகும் எனவும், இந்த கிராமத்திற்கு செல்ல சாலை வசதிகள் சரி வர அமைக்கப்படாததால், மண் அள்ளும் இயந்திரங்கள், மீட்பு நடவடிக்கைகளில் பயன்படுத்தப்படும் இயந்திரங்கள் ஆகியவற்றை பாதிக்கப்பட்ட பகுதிகளுக்கு கொண்டு செல்வதற்கு சிரமப்பட்டு வருகின்றனர்.

நேற்று மாலை நேரத்தில் அங்கு மோசமான வானிலை நிலவியதால், தேசிய பேரிடர் மீட்புப் படையினர் சிறிது நேரம் மீட்புப் பணிகளை நிறுத்தி வைத்து இருந்தது குறிப்பிடத்தக்கது. முன்னதாக, மகாராஷ்டிர முதலமைச்சர் ஏக்நாத் ஷிண்டே, நேற்று காலை நிலச்சரிவால் பாதிக்கப்பட்ட கிராமத்திற்குச் சென்று ஆய்வு மேற்கொண்டார்.

மேலும், நிலச்சரிவில் சிக்கி உயிரிழந்தவர்களின் குடும்பங்களுக்கு மகாராஷ்டிரா அரசு 5 லட்சம் ரூபாய் நிவாரண உதவி அறிவித்து உள்ளது. அதேபோல், இந்த துயர சம்பவத்தால் தான் வேதனை அடைந்ததாக துணை முதலமைச்சர் தேவேந்திர பட்னாவிஸ் தெரிவித்து உள்ளார்.