டெல்லி: கடந்த 2019ஆம் ஆண்டு கர்நாடாகவில் நடந்த பிரசாரக் கூட்டத்தில் கலந்து கொண்ட ராகுல் காந்தி, பிரதமர் மோடி குறித்து அவதூறு கருத்து வெளியிட்டார் எனக் கூறி, குஜராத் எம்.எல்.ஏ. சூரத் நீதிமன்றத்தில் வழக்கு தாக்கல் செய்தார். இந்த வழக்கை விசாரித்த நீதிமன்றம், ராகுல் காந்திக்கு 2 ஆண்டுகள் சிறைத் தண்டனை விதித்து உத்தரவிட்டது.
மேலும் இந்த வழக்கில் ராகுல் காந்தி மேல்முறையீடு செய்ய அனுமதித்த நீதிமன்றம் அதுவரை தீர்ப்பை நிறுத்தி வைப்பதாக தெரிவித்தது. இதையடுத்து ராகுல் காந்தியின் எம்.பி. பதவி தகுதி நீக்கம் செய்யப்படுவதாக நாடாளுமன்ற மக்களவை செயலகம் அறிவித்தது. மக்களவை செயலகம் வெளியிட்ட அறிவிப்பில், "அரசியலமைப்புச் சட்டத்தின் 102(1)(e) விதிகளின் படி, தண்டனை விதிக்கப்பட்ட தேதியிலிருந்து அதாவது 23 மார்ச், 2023 முதல் மக்களவை உறுப்பினர் பதவியில் இருந்து ராகுல் தகுதி நீக்கம் செய்யப்பட்டுள்ளார்" என தெரிவிக்கப்பட்டது.