உக்ரைன் நாட்டில் ரஷ்யா போர் தாக்குதல் மேற்கொண்டுள்ள நிலையில் அந்நாட்டில் சிக்கியுள்ள இந்தியர்களை மீட்டும் நடவடிக்கையை மத்திய அரசு தீவிரமாக மேற்கொண்டுவருகிறது. ஆப்பரேஷன் கங்கா என்ற பெயரில் இந்த மீட்பு நடவடிக்கை மேற்கொள்ளப்படுகிறது. உக்ரைன் நாட்டில் சுமார் 20 ஆயிரத்துக்கும் மேற்பட்ட இந்தியர்கள் சிக்கியுள்ளதாகக் கூறப்படுகிறது.
இதில், இதுவரை ஐந்து விமானங்கள் மூலம் 1,156 இந்தியர்கள் மீட்கப்பட்டுள்ளனர். இந்நிலையில், உக்ரைன் நிலவரம் குறித்து பிரதமர் நரேந்திர மோடி தலைமையில் உயர்மட்ட குழு ஆலோசனைக் கூட்டம் இன்று தலைநகர் டெல்லியில் நடைபெற்றது. இந்த ஆலோசனைக் கூட்டத்தில் வெளியுறவுத்துறை அமைச்சர் ஜெய்சங்கர், தேசிய பாதுகாப்பு ஆலோசகர் அஜித் தோவல், விமானப் போக்குவரத்துறை அமைச்சர் ஜோதிராதித்ய சிந்தியா, அமைச்சர் ஹர்தீப் பூரி, கிரன் ரிஜ்ஜு, வி கே சிங் உள்ளிட்டோர் பங்கேற்றனர்.