புவனேஸ்வர்: ஒடிசாவில் தொடர்ந்து பெய்துவரும் கனமழை காரணமாக மகாநதி ஆற்றில் வெள்ளப்பெருக்கு ஏற்பட்டுள்ளது. வினாடிக்கு சுமார் 10 லட்சம் கனஅடி தண்ணீர் சென்றுகொண்டிருக்கிறது. இதன் காரணமாக 12 மாவட்டங்களில் 4 லட்சத்துக்கும் அதிகமான மக்கள் தங்களது வீடுகளை காலி செய்ய உத்தரவிடப்பட்டுள்ளது.
இதுவரை 54 ஆயிரம் பேர் நிவாரண முகாம்களுக்கு மாற்றப்பட்டுள்ளனர். குறிப்பாக, ஜகத்சிங்பூர், கேந்திரபாரா, பூரி, குர்தா மாவட்டங்களின் 50-க்கும் மேற்பட்ட கிராமங்கள் வெள்ளத்தில் மூழ்கியுள்ளன. மொத்தமாக 425 கிராமங்கள், 10 நகர்ப்புற உள்ளாட்சி அமைப்புகளில் 2.26 மக்கள் வெள்ளத்தால் பாதிக்கப்பட்டுள்ளனர். இன்னும் பல மாவட்டங்களுக்கு கனமழை எச்சரிக்கை விடுக்கப்பட்டுள்ளது.