விண்ணில் பாயவிருக்கும் பி.எஸ்.எல்.வி. ராக்கெட்!
ஆந்திர மாநிலம் ஸ்ரீஹரிகோட்டாவிலிருந்து பி.எஸ்.எல்.வி. சி-49 ராக்கெட் இன்று மாலை 3:02 மணிக்கு விண்ணில் பாய்கிறது. ஆந்திர மாநிலம் ஸ்ரீஹரிகோட்டாவில் உள்ள சதீஸ் தவான் விண்வெளி ஆய்வு மையத்திலிருந்து பி.எஸ்.எல்.வி. சி-49 ராக்கெட், இன்று மாலை 3:02 மணிக்கு 1-ஆவது ஏவுதளத்திலிருந்து விண்ணில் பாய்கிறது.
பிகாரில் மூன்றாம் கட்ட வாக்குப்பதிவு!
பிகார் சட்டப்பேரவைத் தேர்தலுக்கான மூன்றாம் கட்ட வாக்குப்பதிவு இன்று நடைபெறுகிறது. இத்தேர்தல், கெவதி தொகுதியில் போட்டியிடும் அப்துல் பாரி சித்திகி, பிகாரிகஞ்ச் தொகுதியில் போட்டியிடும் சரத் யாதவின் மகள் சுபாஷினி யாதவ், சஹர்சாவிலிருந்து போட்டியிடும் லவ்லி ஆனந்த், மாதூபுராவிலிருந்து நிகில் மண்டல் மற்றும் அமூரைச் சேர்ந்த அக்தருல் இமான் போன்ற தலைவர்களின் தலைவிதியை தீர்மானிக்கும். இது மட்டுமின்றி எட்டு அமைச்சர்களும் களத்தில் உள்ளனர்.
அனைத்துவித பட்டாசுகளுக்கும் இன்று முதல் தடை!
டெல்லியில் இன்று முதல் நவம்பர் 30 ஆம் தேதி வரை அனைத்துவித பட்டாசுகளுக்கும் தடை விதிக்கப்படுவதாக அம்மாநில சுகாதாரத்துறை அமைச்சர் சத்யேந்திர ஜெயின் தெரிவித்தார். அங்கு 3ஆவது கரோனா அலைத் தொற்று பாதிப்பு அதிகரித்து வருவதாகவும், தற்போது 8 ஆயிரத்து 572 கரோனா படுக்கைகள் தயார் நிலையில் இருப்பதாகவும் அவர் கூறினார்.
66ஆவது பிறந்த நாளை கொண்டாடும் கமல்!
கமல்ஹாசனின் 66 ஆவது பிறந்த நாள் இன்று தமிழ்நாடு முழுவதும் அவரது கட்சி தொண்டர்களால் கொண்டாடப்படுகிறது. அதனை முன்னிட்டு அவர் வெளியிட்ட அறிக்கையில், கட்சி தொண்டர்கள் நற்பணிகளை செய்ய முன் வர வேண்டும் என அழைப்பு விடுத்துள்ளார்.
டி-20யில் மோதும் பாகிஸ்தான், ஜிம்பாப்வே அணிகள்!
ஜிம்பாப்வே கிரிக்கெட் அணி பாகிஸ்தானுக்கு சுற்றுப்பயணம் மேற்கொண்டுள்ளது. ஒருநாள் தொடரை 2-1 என பாகிஸ்தான் கைப்பற்றியது. இந்நிலையில், ராவல்பிண்டி கிரிக்கெட் மைதானத்தில் இன்று நடைபெறவுள்ள முதலாவது டி-20 போட்டியில் இரு அணிகளும் மோதுகின்றன.
