’60% மக்களின் குரல் ஒடுக்கப்படுகிறது’ - எதிர்க்கட்சிகள் பேரணியில் ராகுல் குற்றச்சாட்டு

நாட்டின் 60 விழுக்காடு மக்களின் குரலுக்கு நாடாளுமன்றம் மதிப்பளிக்காமல் நாடாளுமன்றக் கூட்டத்தொடர் நிறைவடைந்துள்ளது என ராகுல் காந்தி குற்றம் சாட்டியுள்ளார்.

காங்கிரஸ் மக்களவை உறுப்பினர் ராகுல் காந்தி உள்ளிட்ட முன்னணி எதிர்க்கட்சித் தலைவர்கள் நாடாளுமன்றத்திலிருந்து விஜய் சௌக் நோக்கி முன்னதாக பேரணி மேற்கொண்டனர்.

ராகுல் காந்தி கண்டனம்

இந்தப் பேரணியில் பங்கேற்றுப் பேசிய ராகுல் காந்தி, "நாடாளுமன்றத்தில் எதிர்க்கட்சிகள் பேச அனுமதி மறுக்கப்படுகிறது. எனவே, இன்று நாங்கள் வெளியே வந்து உங்கள் முன் பேசுகிறோம். இதுவொரு ஜனநாயகப் படுகொலை.

60 விழுக்காடு மக்களின் குரலுக்கு நாடாளுமன்றம் மதிப்பளிக்காமல் நாடாளுமன்றக் கூட்டத்தொடர் நிறைவடைந்துள்ளது. 60 விழுக்காடு மக்களின் குரல் ஒடுக்கப்பட்டு அவமதிக்கப்பட்டுள்ளது. நாடாளுமன்றத்தில் உறுப்பினர்கள் தாக்கப்படுவது இதுவே முதல்முறை. எம்.பிக்களை தாக்க வெளி நபர்கள் கொண்டு வரப்பட்டுள்ளனர்" எனக் குற்றம் சாட்டியுள்ளார்.

எதிர்க்கட்சிகள் புகார்

அவரைத் தொடர்ந்து பேசிய சிவசேனா உறுப்பினர் சஞ்சய் ராவத், "நாடாளுமன்றத்தில் நாள்தோறும் ஜனநாயகப் படுகொலை அரங்கேறி வருகிறது. பெண் உறுப்பினர்கள் என்றுகூட பாராமல் காவலர்கள் தாக்குதல் நடத்தியுள்ளனர்" என்றார்.

இந்தப் பேரணியில், திமுக, சிவசேனா, சமாஜ்வாதி கட்சி, தேசிவாத காங்கிரஸ் உள்ளிட்ட 15 எதிர்க்கட்சிகள் பங்கேற்றன. நாடாளுமன்ற மழைக்காலக் கூட்டத்தொடரில் பெகாசஸ், வேளாண் சட்டம், விலைவாசி உயர்வு உள்ளிட்டவை குறித்து விவாதம் நடத்த அனுமதி தரவில்லை என எதிர்க்கட்சிகள் அரசின் மீது தொடர்ந்து குற்றம்சாட்டி வருகின்றன.

எதிர்கட்சிகள் பேரணி

இதையும் படிங்க:முடங்கின காங்கிரஸ் தலைவர்களின் ட்விட்டர் கணக்குகள்