வெற்றியை இலக்காக கொண்டு மன உறுதியை வெளிப்படுத்திய இந்திய அணி - பிரதமர் மோடி புகழாரம்

டெல்லி: ஆஸ்திரேலியாவில் நடைபெற்ற நான்காவது டெஸ்ட் போட்டியில் இந்திய அணி 3 விக்கெட் வித்தியாசத்தில் வெற்றி பெற்று அசத்தியுள்ள நிலையில், வியக்கத்தக்க மன உறுதியை இந்திய அணி வெளிப்படுத்தியுள்ளதாக பிரதமர் மோடி புகழாரம் சூட்டியுள்ளார்.

ஆஸ்திரேலியாவுக்கு எதிராக பிரிஸ்பேனில் நடைபெற்ற நான்காவது டெஸ்ட் போட்டியில் இந்திய அணி 3 விக்கெட் வித்தியாசத்தில் அசத்தல் வெற்றிபெற்றுள்ளது. இந்த வெற்றியின் மூலம் நான்கு போட்டிகள் கொண்ட பார்டர் - கவாஸ்கர் டெஸ்ட் தொடரை 2-1 என்ற கணக்கில் கைப்பற்றி இந்திய அணி வரலாற்று சாதனையையும் நிகழ்த்தியது.

வெற்றியை இலக்காக கொண்டு வியக்கத்தக்க மன உறுதியை இந்திய அணி வெளிப்படுத்தியுள்ளது என பிரதமர் மோடி புகழாரம் சூட்டியுள்ளார். இதுகுறித்து அவர் ட்விட்டர் பக்கத்தில், "ஆஸ்திரேலியாவில் இந்திய கிரிக்கெட் அணி பதிவு செய்த வெற்றியால் பெரும் மகிழ்ச்சி அடைந்துள்ளோம். அவர்களின் மிகச் சிறந்த ஆற்றலும் ஆர்வமும் போட்டி முழுவதும் வெளிப்பட்டது.

அதேபோல்தான், வெற்றியை அடைந்து விட வேண்டும் என்ற நோக்கமும் வியக்கத்தக்க மன உறுதியும் வெளிப்பட்டது. எதிர்காலத்தில் இதுபோன்ற வெற்றியை குவிக்க வாழ்த்துகளை தெரிவித்துக் கொள்கிறேன்" என பதிவிட்டுள்ளார்.

"வரலாற்று சிறப்புமிக்க வெற்றியை பதிவு செய்த இந்திய அணிக்கு தலை வணங்குகிறேன். உங்களது சிறப்பான சாதனையால் ஒட்டு மொத்த நாடுமே பெருமைப்படுகிறது" என மத்திய உள்துறை அமைச்சர் அமித் ஷா வாழ்த்து தெரிவித்துள்ளார்.