வெளிமாநிலங்களுக்கு ஆக்சிஜன் சப்ளை செய்யும் சத்தீஸ்கர்

ராய்ப்பூர்: நாடு முழுவதும் ஆக்சிஜன் பற்றாக்குறை நிலவிவரும் சூழலில், சத்தீஸ்கர் மாநிலம் வெளி மாநிலங்களுக்கு ஆக்சிஜன் வழங்கிவருகிறது.

முழு நாடும் கரோனா தொற்றோடு போராடிக்கொண்டிருக்கிறது. கரோனா இரண்டாம் அலையில் அதி தீவிரமாகப் பரவும் நிலையில், கரோனா நோயாளிகளுக்கு மருந்து, ஆக்சிஜன் போன்றவை கிடைப்பதிலிருந்து, மக்களுக்கு கரோனா தடுப்பூசி செலுத்துவது வரை அனைத்திலும் தட்டுப்பாடு நிலவிவருகிறது. குஜராத் போன்ற சில வடமாநிலங்களில் ஆக்சிஜன் பற்றாக்குறையால் உயிரிழப்புகள் அதிகரிக்கத் தொடங்கியுள்ளது.

இந்நிலையில், சத்தீஸ்கர் மாநிலம் ஆக்சிஜன் தயாரித்து பிற மாநிலங்களுக்கு அனுப்பிவைக்கிறது. இந்த நெருக்கடியான சூழலில், ஆக்சிஜன் மட்டுமில்லாது இந்தியாவின் பாதிக்கப்பட்ட மாநிலங்களான டெல்லி, மகாராஷ்டிரா, மத்தியப் பிரதேசம், உத்தரப் பிரதேசம், கர்நாடகா உள்ளிட்ட மாநிலங்களுக்கு உயிர்காக்கும் ஆக்சிஜன் சிலிண்டர்களையும் வழங்குகின்றது.

சத்தீஸ்கரிலும் கரோனா எண்ணிக்கை அதிகமாக இருந்தபோதிலும், அங்கு ஆக்சிஜன் பற்றாக்குறை இல்லை. கடந்த ஏப்ரல் 11 முதல் 24ஆம் தேதிவரை இந்தியாவின் பிற மாநிலங்களுக்கு சுமார் 2706.95 மெட்ரிக் டன் ஆக்சிஜனை சத்தீஸ்கர் வழங்கியுள்ளது.

இங்கு ஒவ்வொரு நாளும் சுமார் 386.92 மெட்ரிக் டன் அளவுக்கு ஆக்சிஜன் தயாரிக்கப்படுகிறது. இதில் அம்மாநிலத்திலுள்ள 5,898 கரோனா நோயாளிகளின் தேவையான 160 மெட்ரிக் டன் தவிர, மற்றவை வெளிமாநிலங்களுக்கு விநியோகம் செய்யப்படுகின்றது.

சுகாதாரத் துறையின் தரவுகளின்படி, ஆக்சிஜன் தேவைப்படும் நோயாளிகளின் எண்ணிக்கையின் அதிகரிப்பு காரணமாகவே அதன் நுகர்வு அதிகரித்துள்ளது. மார்ச் 14ஆம் தேதி நிலவரப்படி, ஆக்சிஜன் தேவை கொண்ட 197 நோயாளிகளுக்கு வெறும் 3.68 மெட்ரிக் டன் ஆக்சிஜன்தான் தேவைப்பட்டது. இதுவே ஏப்ரல் மாதத்தில் 110.30 மெட்ரிக் டன்னாக உயர்ந்துள்ளது.

சத்தீஸ்கர் மாநிலத்தில் 29 ஆக்சிஜன் தயாரிப்பு நிலையங்கள் உள்ளன. அதில் பிரஷர் ஸ்விங் எனப்படும் மருத்துவத் தரத்திலான ஆக்சிஜன் தயாரிப்பவை 27 ஆலைகளாகும்.

அவை மருத்துவமனைகள், தொழிற்சாலைகளின் தேவையைப் பூர்த்திசெய்கின்றன. இந்த ஆலைகளில் தினசரி 176.92 மெட்ரிக் டன் ஆக்சிஜன் உற்பத்தி செய்யப்படுகிறது. இந்த ஆக்சிஜன் ஆலைகளைத் தவிர, மாநிலத்தின் இரண்டு திரவ மருத்துவ ஆக்சிஜன் உற்பத்தி ஆலைகள் தினமும் 210 மெட்ரிக் டன் ஆக்சிஜனை உற்பத்தி செய்கின்றன.

பிற மாநிலங்களுக்கு சத்தீஸ்கர் வழங்கும் ஆக்சிஜன் விவரம்:

1) கர்நாடகா - 16.82 மெட்ரிக் டன்
2) ஆந்திரா - 176.69 மெட்ரிக் டன்
3) மத்தியப் பிரதேசம் - 801.22 மெட்ரிக் டன்
4) குஜராத் - 120.42 மெட்ரிக் டன்
5) தெலங்கானா - 578 மெட்ரிக் டன்
6) மகாராஷ்டிரா - 1013.8 மெட்ரிக் டன்