தேர்தல் ஆணைய உத்தரவை எதிர்த்து மம்தா தர்ணா

24 மணி நேரம் பரப்புரையில் ஈடுபட தடைவிதித்த தேர்தல் ஆணையத்தின் உத்தரவை எதிர்த்து மேற்கு வங்க முதலமைச்சரும் திருணமூல் காங்கிரஸ் தலைவருமான மம்தா பானர்ஜி தர்ணா போராட்டத்தில் ஈடுபட்டுள்ளார்.

கொல்கத்தா: தேர்தல் பரப்புரையின்போது பல தலைவர்கள் சர்ச்சையை ஏற்படுத்தும் வகையில் கருத்து தெரிவிப்பதுண்டு. அந்த வகையில் இஸ்லாமியர்களின் வாக்குகள் குறித்து கருத்து தெரிவித்ததாக பாஜக அளித்த புகாரின் அடிப்படையில், மம்தா பானர்ஜி விளக்கமளிக்கத் தேர்தல் ஆணையம் உத்தரவிட்டிருந்தது.

இது குறித்து மம்தா பானர்ஜி அளித்த விளக்கம் ஏற்கும்படியாக இல்லை என அதிருப்தி தெரிவித்த தேர்தல் ஆணையம், மம்தா பானர்ஜி தேர்தல் பரப்புரையில் ஈடுபட 24 மணி நேரம் (ஏப். 12 இரவு 8 மணிமுதல் ஏப். 13 இரவு 8 மணி வரை) தடைவிதித்து உத்தரவிட்டது.

மம்தா பானர்ஜி ட்வீட்

இதனைக் கடுமையாக எதிர்த்த மம்தா பானர்ஜி, இன்று மதியம் 12 மணியளவில் கொல்கத்தாவில் உள்ள காந்தி மூர்த்தி பகுதியில் தர்ணா போராட்டத்தில் ஈடுபடவுள்ளதாகத் தனது ட்விட்டர் பக்கத்தில் கூறியுள்ளார்.

அதுமட்டுமின்றி, இந்தியத் தேர்தல் ஆணையத்தின் ஜனநாயக விரோத, அரசியலமைப்பற்ற முடிவுக்கு எதிர்ப்புத் தெரிவிப்பதாகவும் கூறியுள்ளார்.