பாஜக எம்.பியின் குற்றசாட்டு; மஹுவா மொய்த்ரா பதிலடி; எம்.பிகளின் லாகின் விவரங்களை வெளியிட கோரிக்கை

Mahua Moitra: பாஜக எம்.பி தன் மீது குற்றம்சாட்டி எழுதிய கடிதத்தை சமூக வலைத்தள பக்கத்தில் பகிர்ந்துள்ள திரிணாமுல் காங்கிரஸ் எம்.பி மஹுவா மொய்த்ரா, அனைத்து எம்.பிகளின் நாடாளுமன்ற இணையதள லாகின் பயிற்சி, விவரங்களை வெளியிட வேண்டும் என வலியுறுத்தியுள்ளார்.

டெல்லி:திரிணாமுல் காங்கிரஸ் கட்சியின் நாடாளுமன்ற உறுப்பினர் மஹுவா மொய்த்ரா பரபரப்புகளுக்கு பெயர் பெற்றவர். ஒவ்வொரு நாடாளுமன்ற அமர்வின் போது ஆளும்கட்சியை நோக்கி இவர் வீசும் கேள்விக் கணைகள் வலைத்தளங்களில் வைரலாக தவறுவதில்லை. இந்நிலையில் இவரை நோக்கி மற்றொரு எம்.பி. வைத்த புகாரால் இவர் வைரலாகி உள்ளார்.

மஹுவா மொய்த்ரா நாடாளுமன்றத்தில் பாஜகவிற்கு எதிராகவும், அதானி குழுமத்திற்கு எதிராகவும் கேள்வி கேட்பதற்கு தொழிலதிபர் தர்ஷன் ஹிராநந்தனியிடம் இருந்து லஞ்சம் வாங்கியதாகவும், அதுகுறித்து விசாரித்து அவர் மீதி தகுதி நீக்க நடவடிக்கை எடுக்க வேண்டும் என பாஜக எம்.பி. நிஷிகாந்த் துபே, அது தொடர்பாக சபாநாயகர், மத்திய தகவல் தொழில்நுட்பத் துறை அமைச்சர் அஸ்வின் வைஷ்ணவ் மற்றும் இணை அமைச்சர் ராஜீவ் சந்திரசேகர் ஆகியோருக்கு கடிதம் எழுதியுள்ளார்.

மஹுவா மொய்த்ரா மீது துபே வைத்த குற்றச்சாட்டு அரசியல் வட்டாரத்தில் புயலை கிளப்பிய நிலையில், துபே சபாநாயகருக்கு எழுதிய கடிதத்தை மஹுவா தனது X சமூக வலைத்தள பக்கத்தில் பதிவிட்டு அதற்கு விளக்கமளித்துள்ளார். அவரது பதிவில், “நாடாளுமன்றத்தின் அனைத்து உறுப்பினர்களது பணிகளும் அவர்களின் தனி உதவியாளர்கள், உதவியாளர்கள் உள்ளிட்ட பெரிய குழுவினரால் செய்யப்படுகிறது.

மதிப்பிற்குரிய தகவல் தொழில்நுட்பத் துறை அமைச்சர் அஸ்வின் அவர்களே, அனைத்து எம்.பி.களின் நாடாளுமன்ற இணையத்தின் உள்நுழைவு மற்றும் எங்கிருந்து பயன்படுத்துகிறார்கள் என்ற விவரங்களை சிடிஆருடன் வெளியிடுங்கள். அதேபோல் அலுவலர்களுக்கு இணையத்துக்குள் உள்நுழைய வழங்கப்பட்ட பயிற்சி குறித்த விவரங்களையும் தயவுசெய்து வெளியிடுங்கள்” என்று தெரிவித்துள்ளார்.

முன்னதாக, மஹுவா மொய்த்ரா மீது புகார் தெரிவித்து துபே எழுதியிருந்த கடிதத்தில், “திரிணமூல் காங்கிரஸ் எம்.பி மஹுவா மொய்த்ரா தனது மக்களவை இணையதளத்தை பயன்படுத்தும் உள்நுழைவு அனுமதியை தொழிலதிபர் தர்ஷன் ஹிராநந்தனி மற்றும் அவரது ரியல் எஸ்ட்டே நிறுவனம் அதன் சொந்த லாபத்துக்கு பயன்படுத்திக்கொள்ள அனுமதித்தாரா என்பது குறித்து விசாரணை நடத்த வேண்டும்.

மக்களவை இணையதளத்துக்குள்ளே நுழையும் திரிணாமுல் காங்கிரஸ் எம்.பி.யின் அனுமதி, அவர் இல்லாத இடத்தில் இருந்தும் பயன்படுத்தப்பட்டுள்ளதா என்பதை பற்றியும் விசாரணை செய்ய வேண்டும் என்று கேட்டுக்கொள்கிறேன்” என்று அவர் குறிப்பிட்டு இருந்தார்.