"எம்.பிக்கள் கண்ணியமாக நடக்கும் வரை மக்களவைக்கு வரப்போவதில்லை" - ஓம் பிர்லா தகவல்!

நாடாளுமன்றத்தின் கண்ணியத்தை எம்.பிக்கள் கடைபிடிக்கும் வரை அவைக்கு வரப்போவதில்லை என மக்களவை சபாநாயகர் ஓம் பிர்லா தெரிவித்ததாக தகவல் வெளியாகி உள்ளது.

டெல்லி : நாடாளுமன்றத்தின் கண்ணியத்தை எம்.பிக்கள் கடைபிடிக்கும் வரை அவைக்கு வரப்போவதில்லை என மக்களவை சபாநாயகர் ஓம் பிர்லா தெரிவித்ததாக தகவல் வெளியாகி உள்ளது.

கடந்த ஜூலை 20ஆம் தேதி நாடாளுமன்ற மழைக் கால கூட்டத் தொடர் தொடங்கியது முதலே மணிப்பூர் விவகாரத்தை கையில் எடுத்து எதிர்க்கட்சிகள் தொடர் அமளியில் ஈடுபட்டு வருகின்றன. மணிப்பூர் மாநிலத்தில் நிலவும் கலவரச் சம்பவங்கள் மற்றும் இரண்டு பழங்குடியின பெண்கள் நிர்வாணப்படுத்தப்பட்டு ஊர்வலமாக அழைத்துச் சென்று பாலியல் வன்கொடுமை செய்யப்பட்டது குறித்து பிரதமர் மோடி விளக்கம் அளிக்க வேண்டும் என எதிர்க்கட்சிகள் கோரிக்கை விடுத்தன.

எதிர்க்கட்சிகளின் தொடர் அமளியால் நாடாளுமன்றத்தை அமைதியான முறையில் நடத்து பணிகளில் தொய்வு ஏற்பட்டது. இருப்பினும் மணிப்பூர் விவகாரம் குறித்து மத்திய உள்துறை அமைச்சர் அமித் ஷா விளக்கம் கொடுப்பார் எனத் தெரிவிக்கப்பட்டது. மணிப்பூர் கலவரம் தொடர்பாக எவ்வளவு நேரம் வேண்டுமானாலும் விவாதிக்கத் தயார் என நாடாளுமன்றத்தில் மத்திய உள்துறை அமைச்சர் அமித் ஷா தெரிவித்தார்.

இதை ஏற்றுக் கொள்ளாத எதிர்க்கட்சிகளின் கூட்டணி மணிப்பூர் விவகாரம் மற்றும் பெண்களுக்கு எதிரான பாலியல் வன்கொடுமைகளுக்கு எதிராக பிரதமர் மோடி தான் விளக்கம் அளிக்க வேண்டும் என முறையிட்டனர். மேலும் நாடாளுமன்றத்தில் பிரதமர் மோடி தலைமையிலான அரசுக்கு எதிராக நம்பிக்கையில்லா தீர்மானத்தை காங்கிரஸ் கட்சி தாக்கல் செய்தது.

எதிர்க்கட்சிகளின் நம்பிக்கையில்லா தீர்மானம் மீது ஆகஸ்ட் 8ஆம் தேதி முதல் விவாதம் நடத்தப்படும் என நாடாளுமன்ற அலுவல் ஆலோசனைக் கூட்டத்தில் முடிவு எடுக்கப்பட்டது. இந்நிலையில், இன்று (ஆகஸ்ட். 2) வழக்கம் போல் மழைக் கால கூட்டத் தொடரின் 10வது நாள் தொடங்கியது. டெல்லி சேவைகள் மசோதா தொடர்பான விவாதம் நடைபெற இருந்த நிலையில், மாநிலங்களைவையில் எதிர்க்கட்சிகள் வெளிநடப்பு செய்தன.

அதேபோல் மக்களவையிலும் எதிர்க்கட்சி எம்.பிக்கள் தொடர் அமளியில் ஈடுபட்டதை அடுத்து மதியம் 2 மணி வரை அவை ஒத்திவைக்கப்பட்டது. பின்னர் மீண்டு அவை கூடிய நிலையில், எதிர்க்கட்சி எம்.பிக்கள் அமளியால் நாளை (ஆகஸ்ட். 3) வரை அவை ஒத்திவைக்கப்பட்டது. இந்நிலையில் ஆளும் கட்சி மற்றும் எதிர்க்கட்சி எம்.பிக்கள் மீது மக்களவை சபாநாயகர் ஓம் பிர்லா கடும் அதிருப்தியை தெரிவித்துள்ளார்.

எம்.பி.க்கள் சபையின் கண்ணியத்திற்கு ஏற்ப நடந்து கொள்ள வேண்டும் என்றும் அதுவரை தான் மக்களவைக்கு வரமாட்டேன் என்று ஓம் பிர்லா தெரிவித்து உள்ளதாக தகவல் தெரிவிக்கப்பட்டு உள்ளது.

இதையும் படிங்க :Parliament adjourned : 10வது நாளாக முடங்கிய நாடாளுமன்றம்! எதிர்க்கட்சிகள் தொடர் அமளி!