இறுதிவரை போராடு, உன் மீது நம்பிக்கைகொள் - தாமஸ் கோப்பையின் தாரக மந்திரம்! ஸ்ரீகாந்த் சுவாரஸ்யம்

அண்மையில் தாய்லாந்து தலைநகர் பாங்காக்கில் நடந்து முடிந்த தாமஸ் கோப்பை பேட்மிண்டன் தொடரில் இந்திய ஆடவர் அணி சாம்பியன் பட்டம் வென்று சாதனை படைத்தது. இந்த தொடரில் இந்திய அணிக்கு கேப்டன் பொறுப்பு வகித்த ஸ்ரீகாந்த் கிடாம்பி சுவாரஸ்ய விஷயங்களை ஈடிவி பாரத் ஊடகத்துடன் பகிர்ந்துள்ளார். அதை இந்த தொகுப்பில் பார்க்கலாம்.

தாமஸ் கோப்பைத்தொடரில், இந்திய ஆடவர் அணி இறுதிப்போட்டியில் 14 முறை சாம்பியனான இந்தோனேஷியாவை எதிர்கொண்டது. இந்தோனேஷியாவை வீழ்த்துவது கடினம் என வல்லுநர்கள் கூறிய போதிலும் இந்திய வீரர்கள் திறம்பட விளையாடி முதல் 3 ஆட்டத்திலும் வெற்றி பெற்று தங்கத்தை வென்றனர்.

தாமஸ் கோப்பை வென்ற மகிழ்ச்சியில் இந்திய வீரர்கள்

இது குறித்து கேப்டன் ஸ்ரீகாந்த் கிடாம்பி கூறுகையில், 'சக வீரர்களிடம் நான் எதையும் குறிப்பிட்டு பேசவில்லை; ஏனென்றால் அனைவரும் சிறப்பாகவே விளையாடி வந்தனர். இறுதி வரை போராடுங்கள். ஒருங்கிணைந்து விளையாடுவோம். ஒருவருக்கொருவர் ஆதரவு அளித்து விளையாடுவது முக்கியம் என அறிவுறுத்தினேன்' என்றார்.

தாமஸ் கோப்பை வெற்றிக்கு பிறகு இந்தியாவில் பேட்மிண்டன் மேலும் பிரபலமடைந்துள்ளது என தான் கருதுவதாகவும்; பிரதமர் மோடி முதல் பிரபலங்கள் எங்களை பாராட்டியதும்; கிடைத்த ஆதரவும் மிகுந்த மகிழ்ச்சியைத் தந்தது எனத் தெரிவித்தார்.

மேலும் அவர், ’அணி வீரர்களின் பிணைப்பு அற்புதமாக இருந்தது; தொடரின் சில ஆட்டங்களில் ஏற்ற இறக்கம் இருந்தபோதிலும் எல்லாவற்றையும் சாதகமாக எடுத்துக்கொண்டே விளையாடினோம்.

கிடைத்த வாய்ப்புகளில் ஒவ்வொரு வீரரரும் சிறப்பான பங்களிப்பை அளித்தார்கள்; தொடருக்கு முன்பாக தனித் திட்டம் என எதையும் தீட்டவில்லை; ஒவ்வொருவரும் தங்களது முழுத் திறனை வெளிப்படுத்தியதாலேயே இந்த வெற்றி சாதகமானது’ எனவும் ஸ்ரீகாந்த் கிடாம்பி குறிப்பிட்டார்.

இதையும் படிங்க: டி20 தொடருக்கான இந்திய அணியில் சாஹா தேர்வு செய்யப்படாதது ஏன்? - முன்னாள் தேர்வாளர்கள் அதிருப்தி!