குழந்தைக்கு பாலியல் தொல்லை: கேரள ஆசிரியருக்கு 29 ஆண்டுகள் சிறை!

பள்ளி சென்ற குழந்தையை பாலியல் வன்கொடுமை செய்த வழக்கில் ஆசிரியருக்கு திருச்சூர் சிறப்பு நீதிமன்ற 29 ஆண்டுகள் சிறைத் தண்டனை விதித்து தீர்ப்பு வழங்கியது.

திருச்சூர்:தனியார் பள்ளியில் முதலாம் வகுப்பு படித்த குழந்தையிடம் 2012ஆம் ஆண்டு பள்ளி சுற்றுப்பயணம் சென்றபோது பாலியல் அத்துமீறலில் அப்பள்ளி ஆசிரியர் ஈடுபட்டார். அக்குழந்தை இதை தனது பெற்றோரிடம் கூறியதையடுத்து, இதுகுறித்து சிறுமியின் பெற்றோர் காவல்துறையில் புகார் அளித்தனர்.

இதுதொடர்பான வழக்கு இன்று திருச்சூர் சிறப்பு நீதிமன்றத்தில் விசாரணைக்கு வந்தது. இதனை விசாரித்த நீதிமன்றம், குழந்தையை பாலியல் வன்கொடுமை செய்ததற்காக ஆசிரியருக்கு 29 ஆண்டுகள் சிறைத் தண்டனை விதித்து உத்தரவிட்டது.

மேலும், ஆசிரியர் செய்த குற்றம் மனிதாபிமானமற்றது, காட்டுமிராண்டித்தனமானது. குழந்தையிடம் அத்துமீறியது கண்டிக்கத்தக்கது. ஆசிரியர் என்பவர் அறிவு, ஞானம், வாழ்க்கையின் சிறந்த குணங்களின் அடையாளமாக இருக்க வேண்டும். குழந்தையின் எதிர்காலத்தில் ஆசிரியரின் பங்கு முக்கியமானது என நீதிமன்றம் அறிவுரை வழங்கியுள்ளது.