குறைந்தது கோவிட் - சர்வதேச பயணிகள் விமான சேவை மீண்டும் தொடக்கம்

இந்தியாவில் கோவிட் தினசரி பாதிப்பு வெகுவாகக் குறைந்துள்ள நிலையில், சர்வதேச பயணிகள் விமான சேவை மீண்டும் வழக்கம் போல் தொடங்கவுள்ளது.

கோவிட் பரவல் காரணமாக சர்வதேச விமானப் போக்குவரத்து சேவைகளுக்கு கட்டுப்பாடுகளை விமானப் போக்குவரத்து அமைச்சகம் விதித்திருந்தது. கடந்த ஜனவரி மாதம் ஒமைக்ரான் தொற்று காரணமாக மூன்றாம் அலை பரவல் தீவிரமடைந்த நிலையில், தற்போது நாட்டின் தினசரி கோவிட் பாதிப்பு ஐந்தாயிரத்துக்கும் கீழ் குறைந்துள்ளது.

கோவிட் தாக்கம் தற்போது குறைந்துள்ளதால், சர்வதேச விமானப் போக்குவரத்து சேவையை மீண்டும் வழக்கம் போல் தொடங்க விமானப் போக்குவரத்துத்துறை அமைச்சகம் முடிவெடுத்துள்ளது. இம்முடிவு தொடர்பாக விமானப் போக்குவரத்துறை அமைச்சகம் வெளியிட்டுள்ள அறிவிப்பில், வரும் மார்ச் 27ஆம் தேதியிலிருந்து சர்வதேச பயணிகள் விமானப் போக்குவரத்து சேவை வழக்கம் போல் செயல்பட இந்திய அரசு முடிவெடுத்துள்ளது.

இந்த சேவைகள் அனைத்தும் மத்திய சுகாதாரத்துறை அமைச்சகத்தின் வழிகாட்டுதலின் படி நடைபெறும் எனக் கூறப்பட்டுள்ளது. இந்த தகவலை விமானப் போக்குவரத்துறை அமைச்சர் ஜோதிராதித்யா சிந்தியா தனது ட்விட்டர் பக்கத்தில் பகிர்ந்துள்ளார்.

இந்தியாவில் கோவிட்-19 பரவல் காரணமாக 2020ஆம் ஆண்டு மார்ச் 23ஆம் தேதி முதல் சர்வதேச பயணிகள் விமானப் போக்குவரத்துக்கு தடை விதிக்கப்பட்டது. இந்த தடைக்குப்பின் அரசு வந்தே பாரத் திட்டத்தின் மூலம் பல நாடுகளுக்கு தேவைக்கேற்ப விமான சேவையை தொடர்ந்து மேற்கொண்டுவருகிறது. மேலும், பல்வேறு நாடுகளுடன் ஏர் பபுல் ஒப்பந்தம் மூலம் தேவைக்கேற்ப விமான சேவையை அரசு செய்து வருகிறது.

இதையும் படிங்க:TODAY HOROSCOPE: மார்ச் 9 ராசிபலன் - உங்க ராசி எப்படி?