ஒரு லட்சத்திற்குக் கீழ் குறைந்த தினசரி கரோனா தொற்று

சுமார் 63 நாள்களுக்குப் பின்னர், இந்தியாவில் கரோனா தொற்று பாதிப்பு ஒரு லட்சத்திற்கும் கீழ் பதிவாகியுள்ளது.

இந்தியாவில், கடந்த 24 மணி நேரத்தில் 86 ஆயிரத்து 498 பேர் கரோனா தொற்றால் பாதிக்கப்பட்டுள்ளனர். மொத்தப் பாதிப்பு எண்ணிக்கை இரண்டு கோடியே 89 லட்சத்து 96 ஆயிரத்து 473ஆக உள்ளது. கேரளா, கர்நாடகா, ஆந்திரா, தமிழ்நாடு, டெல்லி ஆகிய மாநிலங்களில் அதிகளவில் கரோனா தொற்று பாதிப்புகள் கண்டறியப்பட்டுள்ளன.

குறிப்பாக தமிழ்நாட்டில் நேற்று (ஜுன் 7) ஒரேநாளில் 19 ஆயிரத்து 448 பேருக்குத் தொற்று பாதிப்பு உறுதிசெய்யப்பட்டுள்ளது. இந்த எண்ணிக்கை மற்ற மாநிலங்களைவிட அதிகமாகும். அடுத்தபடியாக கர்நாடகா மாநிலம் உள்ளது. அங்கு, 11 ஆயிரத்து 958 பேருக்குத் தொற்று பாதிப்பு கண்டறியப்பட்டுள்ளது.

நேற்று (ஜுன் 7) மட்டும் 2,123 பேர் சிகிச்சைப் பலனின்றி உயிரிழந்தனர். இதனைத் தொடர்ந்து, உயிரிழந்தோரின் மொத்த எண்ணிக்கை மூன்று லட்சத்து 51 ஆயிரத்து 309ஆக உயர்ந்துள்ளது.தொற்றிலிருந்து குணமடைந்தோர் எண்ணிக்கை இரண்டு கோடியே 73 லட்சத்து 41 ஆயிரத்து 462ஆக உள்ளது. தற்போது 13 லட்சத்து 3 ஆயிரத்து 702 பேர் சிகிச்சைப் பெற்றுவருகின்றனர்.

இதுவரை, மொத்தமாக 23 கோடியே 61 லட்சத்து 98 ஆயிரத்து 726 பேருக்குத் தடுப்பூசி செலுத்தப்பட்டுள்ளது என்று மத்திய சுகாதாரத் துறை அமைச்சகம் தகவல் தெரிவித்துள்ளது.