IND VS Spain Hockey: ஸ்பெயினை 2-0 என்ற கோல் கணக்கில் வீழ்த்தி இந்தியா முதல் வெற்றி

உலகக் கோப்பை ஹாக்கி தொடரில் ஸ்பெயின் அணிக்கு எதிரான முதலாவது லீக் ஆட்டத்தில் 2-க்கு 0 என்ற கோல் கணக்கில் வெற்றி பெற்று இந்திய அணி தனது முதல் வெற்றியைப் பதிவு செய்தது.

புவனேஸ்வர்:15-வது உலகக் கோப்பை ஹாக்கி திருவிழா ஒடிசாவின் ரூர்கேலா மற்றும் புபனேஸ்வர் ஆகிய நகரங்களில் தொடங்கி கோலாகலமாக நடைபெற்று வருகிறது. ஜனவரி 13ஆம் தேதி முதல் 29ஆம் தேதி வரை தொடர் நடைபெறத் திட்டமிடப்பட்டுள்ளது. நேற்று ஹாக்கி தொடரின் தொடக்க விழா வண்ண வண்ண விளக்குகளுக்கு மத்தியில் கண்கவர் கலை நிகழ்ச்சிகளுடன் கோலாகலமாக நடைபெற்றது.

கடந்த 2018ஆம் ஆண்டு 14-வது உலகக் கோப்பை ஹாக்கி தொடர் இந்தியாவில் நடத்தப்பட்டது. 4 ஆண்டுகள் கழித்து தற்போது மீண்டும் சொந்த ஊரில் உலக கோப்பை ஹாக்கி தொடர் நடைபெறுகிறது. இதன் மூலம் தொடர்ச்சியாக இருமுறை ஹாக்கி தொடரை நடத்திய முதல் நாடு என்ற சிறப்பு பெருமையை இந்தியா பெற்றது. தொடரில் 16 அணிகள் கலந்து கொண்டுள்ள நிலையில், அவை நான்கு பிரிவுகளாக பிரிக்கப்பட்ட லீக் ஆட்டங்கள் நடைபெறுகின்றன. 'ஏ' பிரிவில் ஆஸ்திரேலியா, அர்ஜென்டினா, பிரான்ஸ், தென்ஆப்பிரிக்கா அணிகளும் 'பி' பிரிவில் நடப்பு சாம்பியன் ஆன பெல்ஜியம், ஜெர்மனி, தென்கொரியா, ஜப்பான் அணிகளும் உள்ளன.

‘சி' பிரிவில் நெதர்லாந்து, நியூசிலாந்து, மலேசியா, சிலி நாடுகளும், 'டி' பிரிவில் இந்தியா, இங்கிலாந்து, ஸ்பெயின், வேல்ஸ் ஆகிய அணிகளும் இடம் பெற்றுள்ளன. ஒவ்வொரு அணியும் தங்கள் பிரிவில் உள்ள மற்ற அணிகளுடன் தலா ஒரு முறை மோத வேண்டும். லீக் முடிவில் ஒவ்வொரு பிரிவிலும் முதலிடத்தைப் பிடிக்கும் அணிகள் நேரடியாக கால்இறுதிக்கு முன்னேறும்.

அதேநேரம் அனைத்து பிரிவுகளிலும் 2 மற்றும் 3-வது இடத்தைப் பிடிக்கும் அணிகள் 2-வது சுற்றில் மோதி அதில் இருந்து 4 அணிகள் கால்இறுதிக்குத் தேர்வாகும். இன்று(ஜன.13) நடைபெற்ற லீக் ஆட்டத்தில் தொடரை நடத்தும் இந்தியா, ஸ்பெயின் அணியை எதிர்கொண்டது. ஆட்டத்தின் 12-வது நிமிடத்தில் இந்திய வீரர் ரோகிதாஸ் அமித் கோல் அடித்தார். தொடர்ந்து 26-வது நிமிடத்தில் ஹர்திக் சிங் மற்றொரு கோல் அடித்து அணியின் கோல் கணக்கை 2-க்கு 0 என்ற கணக்கில் கொண்டு வந்தார்.

இந்திய வீரர்களின் தடுப்பு ஆட்டத்திற்கு மத்தியில் ஸ்பெயின் வீரர்களால் பதில் கோல் திருப்ப முடியவில்லை. ஷூட் அவுட் வாய்ப்புகள் இரு அணிக்கும் கிடைத்த போது வீணடிக்கப்பட்டன. ஆட்ட நேர முடிவில் இந்திய அணி 2-க்கு 0 என்ற கோல் கணக்கில் தனது முதல் வெற்றியைப் பதிவு செய்தது.

முன்னதாக நடந்த மற்ற மூன்று லீக் ஆட்டங்களில், முதலாவது ஆட்டத்தில் அர்ஜென்டினா அணி 1-க்கு 0 என்ற கோல் கணக்கில் தென் ஆப்பிரிக்காவையும், 2-வது ஆட்டத்தில் ஆஸ்திரேலியா 8-க்கு 0 என்ற கணக்கில் பிரான்சையும், 3-வது லீக் ஆட்டத்தில் இங்கிலாந்து அணி 5-க்கு 0 என்ற கோல் கணக்கில் வேல்சை அணியையும் வீழ்த்தி வெற்றி பெற்றன.

இதையும் படிங்க:"எனது கேப்டன்சியில் மாற்றத்தை கொண்டு வந்தவர் ஆஷிஷ் நெஹ்ரா" - ஹர்திக் பாண்டியா நெகிழ்ச்சி...