புதுச்சேரியில் தலைக்கவசம் கட்டாயம்: மீறினால் ரூ.1000 அபராதம்

புதுச்சேரியில் இன்றுமுதல் (ஜூலை 1) தலைக்கவசம் கட்டாயம் என்றும், மீறுபவர்களுக்கு 1000 ரூபாய் அபராதம் விதிக்கப்படும் எனவும் அம்மாநில காவல் துறை எச்சரித்துள்ளது.

புதுச்சேரி மாநிலத்தில் 73 வகை போக்குவரத்து விதிகளுக்கு அபராதத் தொகையை அதிகரித்து, திருத்தப்பட்ட மோட்டார் வாகன சட்டம் கடந்த ஜனவரி 31ஆம் தேதி நடைமுறைப்படுத்தப்பட்டது.

அதில், தலைக்கவசம் அணியாமல் இருசக்கர வாகனம் ஓட்டினால் ஆயிரம் ரூபாய் அபராதம், மூன்று மாதங்களுக்கு ஓட்டுநர் உரிமம் தகுதிநீக்கம், இருசக்கர வாகனத்தில் இரண்டு நபர்களுக்கு மேல் பயணித்தால் ஆயிரம் ரூபாய் அபராதம் எனக் குறிப்பிடப்பட்டுள்ளது.

தலைக்கவசம் உயிர்க்கவசம்

அதன்படி, தலைக்கவசம் அணியாமல் வாகனம் ஓட்டுபவர்களிடம் போக்குவரத்துக் காவல் துறையினர் ஆயிரம் ரூபாய் அபராதம் வசூலித்தனர். இதற்குப் பல்வேறு தரப்பினர் எதிர்ப்புத் தெரிவித்தனர். இந்தச் சூழலில், கரோனா பரவல் காரணமாக அபராத அறிவிப்பு நிறுத்திவைக்கப்பட்டிருந்தது.

இந்நிலையில் புதுச்சேரி மாநில காவல் துறைத் தலைவர் ரன்வீர் சிங் கிருஷ்ணய்யா இன்று (ஜூலை 1) போக்குவரத்து காவலர்களுடன் ஆலோசனை நடத்தினார்.

வாகன சோதனை

அதில், இருசக்கர வாகனத்தில் தலைக்கவசம் அணியாமல் செல்பவர்களிடமிருந்து அபராதம் வசூலிக்க வேண்டும் என உத்தரவிட்டார். இதையடுத்து புதுச்சேரி மாநிலத்தில் இன்றுமுதல் போக்குவரத்து காவலர்கள் ஆங்காங்கே வாகன சோதனையில் ஈடுபட்டுவருகின்றனர்.

இதையும் படிங்க: 'பெலகாவி உதவும் கரங்கள்!'