Cauvery Water Dispute: "கர்நாடக அரசு ஆணைய உத்தரவுப்படி தமிழ்நாட்டிற்கு தண்ணீர் திறந்துவிட்டுள்ளது" - CWMA உச்சநீதிமன்றத்தில் தகவல்!

கர்நாடக அரசு காவிரி நீர் மேலாண்மை ஆணைய உத்தரவுப்படி, கடந்த ஆகஸ்ட் 12ஆம் தேதி முதல் 26ஆம் தேதி வரை கர்நாடகா அரசு பிலிகுண்டுலுவில் இருந்து மொத்தம் 1,49,898 கன அடி நீர் திறந்துவிட்டுள்ளதாகவும், கடந்த 29ஆம் தேதி நடந்த ஆணையத்தின் கூட்டத்தில் அடுத்த 15 நாட்களுக்கு விநாடிக்கு 5,000 கனஅடி நீர் திறந்துவிட கர்நாடக அரசுக்கு உத்தரவிடப்பட்டுள்ளதாகவும் காவிரி நீர் மேலாண்மை ஆணையம் உச்சநீதிமன்றத்தில் தெரிவித்துள்ளது.

டெல்லி: தமிழ்நாடு மற்றும் கர்நாடகா இடையே காவிரி நதிநீர் பங்கீட்டு பிரச்சினை நீண்ட காலமாக நீடித்து வருகிறது. இந்த நதிநீர் பங்கீட்டிற்காக உச்சநீதிமன்ற தீர்ப்பின்படி காவிரி நீர் மேலாண்மை ஆணையம் அமைக்கப்பட்டது. ஆனாலும், நிர்ணயிக்கப்பட்ட அளவு தண்ணீரை தமிழ்நாட்டிற்கு வழங்க கர்நாடகா மறுத்து வருகிறது. அந்த வகையில், வழக்கம்போல் இந்த ஜூலை மாதமும் போதிய அளவு தண்ணீரை கர்நாடகா திறந்துவிடவில்லை.

காவிரியில் தண்ணீர் வராததால் தமிழ்நாட்டின் காவிரி டெல்டா மாவட்டங்களில் குறுவை சாகுபடி பாதிக்கப்பட்டது. பயிர்கள் கறுகிய நிலையில், இது தொடர்பாக தமிழக அரசு சார்பில் மத்திய ஜல்சக்தித்துறை அமைச்சருக்கு கடிதம் எழுதப்பட்டது. அதன் பிறகு போதிய அளவு தண்ணீர் திறக்கப்படவில்லை. பருவமழை குறைந்ததால் நீர் இருப்பு இல்லை என கர்நாடகா கூறியது.

இதைத் தொடர்ந்து கடந்த ஆகஸ்ட் 10ஆம் தேதி நடந்த காவிரி ஒழுங்காற்றுக்குழு கூட்டத்தில், ஆகஸ்ட் 11ஆம் தேதி முதல் 15 நாட்களுக்கு பிலிகுண்டுலுவில் இருந்து விநாடிக்கு 15,000 கனஅடி நீர் திறந்துவிட வேண்டும் எனப் பரிந்துரை செய்யப்பட்டது. அதைத் தொடர்ந்து ஆகஸ்ட் 11ஆம் தேதி டெல்லியில் காவிரி நீர் மேலாண்மை ஆணையக் கூட்டம் நடந்தது. அதில், தங்களுக்கு தண்ணீர் தட்டுப்பாடு இருப்பதால் தமிழ்நாட்டிற்கு விநாடிக்கு 10,000 கனஅடி நீர் திறந்து விடுகிறோம் என்று கர்நாடகா தரப்பில் தெரிவிக்கப்பட்டது. இதனை ஆணையமும் ஏற்றுக் கொண்டது. இதற்கு தமிழ்நாட்டில் கடும் எதிர்ப்பு கிளம்பியது. காங்கிரசுடன் கூட்டணியில் இருப்பதால் தமிழக அரசு காவிரி நதிநீர் விவகாரத்தில் அமைதி காப்பதாக அரசியல் கட்சிகள் குற்றம் சாட்டின.

இதையடுத்து, இந்த விவகாரம் தொடர்பாக கடந்த ஆகஸ்ட் 14ஆம் தேதி தமிழக அரசு சார்பில் உச்சநீதிமன்றத்தில் புதிய வழக்கு தொடரப்பட்டது. அதில், ஆகஸ்ட் மாதத்திற்கான தண்ணீரை கர்நாடகா வழங்கவில்லை என்றும், ஆணையம் உத்தரவிட்டும் அதனை செயல்படுத்தவில்லை என்றும் தெரிவிக்கப்பட்டது. இந்த வழக்கில் கர்நாடகா தாக்கல் செய்த பதில் மனுவில், நடப்பாண்டில் காவிரி நீர்ப்பிடிப்பு பகுதிகளில் மழை குறைவாகவே பொழிந்துள்ளதால், கிருஷ்ணராஜ சாகர், கபினி ஆகிய பிரதான அணைகள் நிரம்பவில்லை என்றும், இருப்பினும் தமிழ்நாட்டிற்கு காவிரி நீர் திறந்துவிடப்பட்டுள்ளது என்றும் தெரிவிக்கப்பட்டது.

கடந்த ஆகஸ்ட் 21ஆம் தேதி விசாரணையின்போது, உச்சநீதிமன்ற உத்தரவுப்படியும், காவிரி நீர் மேலாண்மை ஆணைய உத்தரவுப்படியும் கர்நாடகா நடந்து கொள்ளவில்லை என்பதால் புதிய அமர்வை நியமிக்க வேண்டும் என தமிழக அரசு கோரியது. அதன்படி, பி.ஆர்.கவாய், பி.எஸ்.நரசிம்மா, பி.கே.மிஸ்ரா ஆகியோர் அடங்கிய புதிய அமர்வு இந்த வழக்கை விசாரித்து வருகிறது.

இதற்கிடையில் கடந்த சில நாட்களுக்கு முன்பு காவிரி ஒழுங்காற்று குழு கூட்டம் மற்றும் காவிரி மேலாண்மை ஆணைய கூட்டம் நடைபெற்றது. இதில், விநாடிக்கு 7,200 கனஅடி நீர் திறக்க வேண்டும் என தமிழக அரசு சார்பில் வலியுறுத்தப்பட்டது. ஆனால், விநாடிக்கு 5,000 கனஅடி மட்டுமே தண்ணீர் திறக்க கர்நாடக அரசுக்கு மேலாண்மை ஆணையம் உத்தரவிட்டிருந்தது. இதற்கு தமிழக அரசு கடும் கண்டனம் தெரிவித்தது.

இந்த நிலையில், காவிரி நதிநீர் தொடர்பான தமிழக அரசின் வழக்கு நேற்று (ஆகஸ்ட் 31)உச்சநீதிமன்றத்தில் விசாரணைக்கு வந்தது. அப்போது, காவிரி நதிநீர் மேலாண்மை ஆணையம் தாக்கல் செய்த பதில் மனுவில், கடந்த ஆகஸ்ட் 12ஆம் தேதி முதல் 26ஆம் தேதி வரை கர்நாடகா அரசு பிலிகுண்டுலுவில் இருந்து மொத்தம் 1,49,898 கன அடி நீர் திறந்துவிட்டுள்ளதாகவும், இதன் மூலம் கர்நாடக அரசு ஆணையத்தின் உத்தரவை நிறைவேற்றியுள்ளதாகவும் தெரிவிக்கப்பட்டுள்ளது. அதேபோல், கடந்த 29ஆம் தேதி நடந்த ஆணையத்தின் கூட்டத்தில் அடுத்த 15 நாட்களுக்கு விநாடிக்கு 5,000 கனஅடி நீர் திறந்துவிட கர்நாடக அரசுக்கு உத்தரவிடப்பட்டுள்ளதாகவும் பதில் மனுவில் குறிப்பிடப்பட்டுள்ளது.