புதுச்சேரி தலைமைச் செயலகம் அருகே மத்திய சுற்றுச்சூழல் அமைச்சகம் மற்றும் புதுச்சேரி அறிவியல், தொழில்நுட்பம் & சுற்றுச்சூழல் துறை ஆகியவற்றின் சார்பில் கடற்கரைத் தூய்மைப் பணி மற்றும் விழிப்புணர்வு நிகழ்ச்சி நடைபெற்றது. அதில் தெலங்கானா ஆளுநரும் புதுச்சேரி துணைநிலை ஆளுநருமான தமிழிசை சௌந்தரராஜன், மத்திய சுற்றுச்சூழல் அமைச்சர் பூபேந்திர யாதவ் உள்ளிட்டோர் கலந்துகொண்டனர்.
அப்போது, தூய்மைக் கடற்கரை மற்றும் பாதுகாப்பான கடல் விழிப்புணர்வு உறுதிமொழியை ஆளுநர் வாசிக்க அனைவரும் எடுத்துக் கொண்டனர். அதன்பின் சுற்றுச்சூழல் விழிப்புணர்வு குறித்த பள்ளி-கல்லூரி மாணவர்களின் நடைப்பயணம், மிதிவண்டி பேரணியை ஆளுநர் மற்றும் அமைச்சர் கொடியசைத்துத் தொடங்கி வைத்தனர். அதனைத் தொடர்ந்து கடற்கரை மணற்பரப்பில் சிதரிக் கிடந்த நெகிழிப் பொருட்களை தூய்மைப்படுத்தும் பணியையும் தொடங்கி வைத்தனர்.
அப்போது செய்தியாளர்களிடம் பேசிய தமிழிசை, "தூய்மை கடற்கரையை உருவாக்க இந்தியா முழுவதும் பல கடற்கரைகளைத் தேர்ந்தெடுத்து இருக்கிறார்கள். அதில் புதுச்சேரி கடற்கரையும் தேர்ந்தெடுக்கப்பட்டு இருப்பதும், மத்திய அமைச்சரே இதனை தொடங்கி வைத்திருப்பதும் நமக்கு மகிழ்ச்சி.