சென்னை உயர் நீதிமன்ற கருத்து: உச்ச நீதிமன்றத்தை நாடிய தேர்தல் ஆணையம்

சென்னை உயர் நீதிமன்றத்தின் கருத்துக்கு எதிர்ப்பு தெரிவித்து இந்தியத் தேர்தல் ஆணையம் உச்ச நீதிமன்றத்தை நாடியுள்ளது.

தமிழ்நாட்டில் கரோனா இரண்டாவது அலை தீவிரமடைந்து தற்போது உச்சத்தை கடந்துள்ளது. இந்நிலையில், வழக்கு விசாரணை ஒன்றில் சென்னை உயர் நீதிமன்ற தலைமை நீதிபதி, தமிழ்நாட்டில் கரோனா தொற்றின் இரண்டாவது அலைக்கு தேர்தல் ஆணையமே முக்கியக் காரணம், இதற்காக கொலை வழக்கே பதிவுசெய்யலாம் என கருத்து தெரிவித்திருந்தார்.

நீதிபதியின் இந்தக் கருத்து பெரும் பரபரப்பை ஏற்படுத்தியது. கொலை வழக்கு பதிவு செய்யலாம் என்ற சென்னை உயர் நீதிமன்றத்தின் கருத்துக்கு எதிராக தேர்தல் ஆணையம் சென்னை உயர் நீதிமன்றத்தில் மேல் முறையீடு செய்தது.

இந்த மனுவை விசாரித்த உயர் நீதிமன்றம் அதனைத் தள்ளுபடி செய்து உத்தரவிட்டது. பின்னர் தேர்தல் ஆணையம் இந்த வழக்குத் தொடர்பாக உச்ச நீதிமன்றத்தில் முறையீடு செய்துள்ளது.

இந்நிலையில், இந்த விவகாரம் வரும் மே 3ஆம் தேதி நீதிபதி டி.ஒய். சந்திரசூட், நீதிபதி எம்.ஆர். ஷா ஆகியோர் அடங்கிய அமர்வில் பட்டியலிடப்பட்டுள்ளது.