டெல்லி: அரவிந்த் கெஜ்ரிவாலுக்கு கரோனா அறிகுறிகள் லேசாக தென்பட்ட நிலையில் அவருக்கு கோவிட்-19 பாதிப்பு உறுதியாகியுள்ளது. இதனை அவர் ட்விட்டரில் தெரிவித்துள்ளார்.
டெல்லி முதலமைச்சரும் ஆம் ஆத்மி தலைமை ஒருங்கிணைப்பாளருமான அரவிந்த் கெஜ்ரிவாலுக்கு கரோனா பாதிப்பு இன்று (ஜன.4) உறுதி செய்யப்பட்டுள்ளது. இதனை ட்விட்டரில் தெரிவித்துள்ள அரவிந்த் கெஜ்ரிவால், “தனக்கு கோவிட் பெருந்தொற்று உறுதி செய்யப்பட்டுள்ளது.
லேசான அறிகுறிகள் ஏற்பட்ட நிலையில் என்னை சோதித்துக் கொண்டேன். தற்போது வீட்டில் தனிமைப்படுத்தலில் உள்ளேன். என்னுடன் தொடர்பில் இருந்தவர்கள் தங்களை பரிசோதித்துக் கொள்ள வேண்டும் எனக் கேட்டுக்கொள்கிறேன்” எனத் தெரிவித்துள்ளார்.
அரவிந்த் கெஜ்ரிவால் திங்கள்கிழமை (ஜன.3) தேர்தல் பரப்புரைக்காக உத்தரகாண்ட் சென்றிருந்தார். தொடர்ந்து டேராடூனில் நடந்த பொதுக்கூட்ட நிகழ்விலும் கலந்துகொண்டார்.