அவுரங்கசீப் லேன் பெயர் மாற்றம்.. அப்துல் கலாம் லேன் என மாற்றம்!

டெல்லி அவுரங்கசீப் லேன், டாக்டர் ஏ.பி.ஜே அப்துல் கலாம் லேன் என பெயர் மாற்றம் செய்யப்பட்டு உள்ளது. முன்னதாக கடந்த 2015ஆம் ஆண்டு அவுரங்கசீப் சாலை, அப்துல் கலாம் சாலையாக பெயர் மாற்றம் செய்யப்பட்டு இருந்தது குறிப்பிடத்தக்கது.

டெல்லி : தலைநகர் டெல்லியில் உள்ள அவுரங்கசீப் லேன் சாலைக்கு டாக்டர் ஏ.பி.ஜே அப்துல் கலாம் லேன் என பெயரிடப்பட்டு உள்ளது. அவுரங்கசீப் லேன் என்ற பெயருக்கு பதிலாக டாக்டர் ஏ.பி.ஜே அப்துல் கலாம் லேன் என்று மறுபெயரிடும் முடிவுக்கு கடந்த மாதம் டெல்லி நகராட்சி கவுன்சில் ஒப்புதல் வழங்கிய நிலையில் பெயர் மாற்றம் செய்யப்பட்டு உள்ளது.

இதையடுத்து டெல்லி லுடியன்ஸ் நகரில் உள்ள அவுரங்கசீப் லேன் என்ற பெயர் பலகை நீக்கப்பட்டு அதற்கு பதிலாக டாக்டர் ஏ.பி.ஜே. அப்துல் கலாம் லேன் என்ற பெயர் பலகைகள் வைக்கப்பட்டன.

முன்னதாக அவுரங்கசீப் லேன் பெயர் மாற்றம் குறித்த அறிவிப்பை வெளியிடும் போது டெல்லி நகராட்சி கவுன்சில் துணைத் தலைவர் சதீஷ் உபாத்யாய், அவுரங்கசீப் இந்திய கலாச்சாரத்தை அழிக்க முயன்றதாகவும், முகலாய பேரரசரின் பெயரில் எந்த சாலையும் இருக்கக்கூடாது என்றும் கூறியது சர்ச்சையை ஏற்படுத்தியது.

முன்னதாக கடந்த 2015ஆம் ஆண்டு டெல்லியில் உள்ள அவுரங்க சீப் சாலையை, டாக்டர் ஏ.பி.ஜே அப்துல் கலாம் சாலை என பெயர் மாற்றம் செய்வதற்கான முன்மொழிவுக்கு டெல்லி நகராட்சி கவுன்சில் ஒப்புதல் வழங்கியது குறிப்பிடத்தக்கது. இதையடுத்து அவுரங்கசீப் சாலை, டாக்டர் ஏ.பி.ஜே. அப்துல் கலாம் சாலையாக பெயர் மாற்றம் செய்யப்பட்டது குறிப்பிடத்தக்கது.

முன்னாள் குடியரசுத் தலைவர் ஏ.பி.ஜே.அப்துல் கலாமுக்கு புகழஞ்சலி செலுத்தி அவரை கவுரவிக்கும் வகையில், டெல்லி அவுரங்கசீப் சாலையின் பெயரை மாற்ற வேண்டும் என்று கோரிக்கை வைக்கப்பட்டது. இது தொடர்பான தீர்மானம் டெல்லி நகராட்சி கவுன்சில் கூட்டத்தில் முன்மொழியப்பட்ட நிலையில் ஒப்புதல் வழங்கப்பட்டது.

டெல்லி அப்துல் கலாம் சாலை அவுரங்கசீப் லேன் வழியாக பிரித்வி ராஜ் சாலையுடன் இணைகிறது. டெல்லி லுட்யன்ஸ் பகுதியில் உள்ள முகலாய பேரரசர்களின் பெயரிடப்பட்ட சாலைகளை மறுபெயரிடுமாறு கடந்த 2022 ஆம் ஆண்டு பாஜக டெல்லி பிரிவினர் வடக்கு டெல்லி நகராட்சி கார்ப்பரேஷனிடம் கோரிக்கை விடுத்தனர்.

தலைநகரில் உள்ள ஆறு சாலைகளின் பெயர்களை மாற்றக் கோரி, அப்போதைய பாஜக டெல்லி தலைவர் மாநகராட்சிக்கு கடிதம் எழுதினார். துக்ளக் சாலையை குரு கோவிந்த் சிங் சாலை என்றும், அக்பர் சாலையை மகாராணா பிரதாப் சாலை என்றும், அவுரங்கசீப் லேனை டாக்டர் ஏ.பி.ஜே. அப்துல் கலாம் லேன் என்றும் ஷாஜகான் சாலையை ஜெனரல் பிபின் ராவத் சாலை என்றும் மாற்றக் கோரி இருந்தது குறிப்பிடத்தக்கது.

இதையும் படிங்க :இந்திய தூதரகம் மீது தாக்குதல் திட்டமா? இங்கிலாந்து வெளியுறவு அமைச்சர் கண்டனம்!