விவசாயிகள் போராட்டத்தில் காங்கிரஸ்... அறுவடை செய்த முதல் அரசியல் லாபம்!

விவசாயிகளின் போராட்டத்தினால் முதலில் திக்குமுக்காடிப் போன கட்சிகளில் ஒன்று ஷிரோமணி அகாலி தளம். காங்கிரஸ் தலைவரும் பஞ்சாப் முதலமைச்சருமான கேப்டன் அமரிந்தர் சிங் அதிரடி செயல்களில் ஈடுபடுவதில் நிபுணர். அவர் ஷிரோமணி அகாலி தளத்தை அதனுடைய கூட்டணிக் கட்சியான பாரதிய ஜனதா கட்சியின் உறவிலிருந்து விலகியிருக்க வைத்ததோடு நில்லாமல், விவசாயிகளின் போராட்டப் பிரச்னையில் அந்தக் கட்சியை அச்சுறுத்தப்படும் நிலைக்கும் தள்ளிவிட்டார்.

காங்கிரஸ் கட்சிக்கு விவசாயப் போராட்டத்தினால் முதல் அரசியல் லாபம் கிடைத்திருக்கிறது என்பதை பஞ்சாபில் நடந்து முடிந்த உள்ளாட்சித் தேர்தல் காட்டியிருக்கிறது. எட்டு மாநகராட்சிகளில் 7ஐ கைப்பற்றி இருக்கிறது காங்கிரஸ் கட்சி. அந்த வாக்காளர்கள் முன்பு வைக்கப்பட்ட ஒரே தேர்தல் பிரச்னை மூன்று வேளாண் சட்டங்கள் மட்டுமே. மற்ற எல்லா இடங்களையும் விட காங்கிரஸ் சுவைத்த இனிமையான வெற்றி என்பது பதிண்டாவில்தான் நிகழ்ந்திருக்கிறது. ஏனென்றால் அந்த மாநகராட்சியில் காங்கிரஸ் 53 ஆண்டுகளுக்குப் பின்னர் அதிகாரத்திற்கு மீண்டு அல்லது மீண்டும் வந்திருக்கிறது.

பஞ்சாபில் கனிந்த இந்த வெற்றி அண்டை மாநிலமான ஹரியானாவிலும் நிச்சயமாக எதிரொலிக்கத்தான் போகிறது. ஹரியானாவில் பாஜக தேர்தலுக்குப் பிந்தித் தாளித்துக் கொட்டிய கூட்டுப்பொரியல் கூட்டணியை உருவாக்கி அதன் மூலம் மனோகர் லால் கட்டாரை முதலமைச்சராக்கி அதிகாரத்தில் வைத்திருக்கிறது.

எல்லைக்கு அப்பால் நிகழ்ந்த காங்கிரஸின் வெற்றியால், அதாவது பஞ்சாப் உள்ளாட்சித் தேர்தல் வெற்றியால், ஹரியானா கூட்டணியில் விரிசல்கள் எழக் கூடும். மேலும், இந்த வெற்றி தில்லி எல்லையில் நடந்துகொண்டிருக்கும் விவசாயிகளின் போராட்டத்திற்கு மேலும் வலுசேர்க்கும். விவசாயிகளின் தலைவரான ராகேஷ் டிகைட்டின் கண்ணீர் மேற்கு உத்தரப் பிரதேசத்தில் உள்ள ஜாட் இனமக்களை ஒன்றுசேர்த்து வைத்திருந்தாலும், அது பாஜகவைப் பயமுறுத்தும் பிரமாண்டமானதோர் அரசியல் இயக்கமாக மாறிவிட வில்லை; இப்போதைக்கு விவசாயிகளின் போராட்டத்திற்கு அந்த மாநிலத்தின் தொலைதூரப் பகுதிகளில் பெரிதாக ஆதரவு இல்லை. ஆகவே உத்தரப் பிரதேசத்தின் முதல் அமைச்சரான யோகி ஆதித்யாநாத் இப்போதைக்கு நிம்மதியாய் இருக்கலாம்.

ஆனால் இப்போது மெல்ல எழுந்துவரும் கேள்வி இதுதான்: விவசாயிகள் போராட்டத்தின் அரசியல் விளைவுகளை மனதில் வைத்தாலாவது காவிக்கட்சியால் இனியும் அதை அலட்சியம் செய்ய முடியுமா. மத்திய அரசு தெளிவாகவே சொல்லிவிட்டது, தன்னால் வேளாண் சட்டங்களை வாபஸ் பெறமுடியாது என்று. ஆனால் ஓரளவிற்குத் திருத்தங்கள் செய்யத் தயாராக இருப்பதாக அரசு சொல்கிறது. ஆனால் இந்த அழுத்தமான விட்டுக் கொடுக்காத பிடிவாதப் பேரம் பெரும் சிக்கலை ஏற்படுத்தி விட்டது. இந்த முட்டுச்சந்து நிலவரத்திற்கு அரசியல் ரீதியாக பாஜக பெரியதோர் விலை கொடுக்க வேண்டி வரலாம்.

பஞ்சாப் உள்ளாட்சித் தேர்தலைப் பொறுத்தவரையில் பாஜக வெறும் இளைய பங்காளிதான். ஆனால் தேர்தலில் முன்வைக்கப்பட்ட பரப்புரைச் சமாச்சாரமே வேளாண்மைச் சட்டங்கள்தான் என்பதை காவிக்கட்சி மறந்துவிடக் கூடாது. தேர்தல்கள் வரவிருக்கின்றன; இந்திபேசும் பிரதானமான மாநிலங்களில் அல்ல. கேரளாவிலும், தமிழ்நாட்டிலும் கூட பாஜக வெறும் இளைய பங்காளிதான் அல்லது சிறிய போட்டியாளர்தான். ஆனால் மேற்கு வங்காளத்திலும் அஸ்ஸாமிலும் அது பெரிய போட்டியாளர். தில்லியைச் சுற்றிப் பற்றிப் படரும் விவசாயிப் போராட்ட நெருப்பின் வெம்மை இந்த மாநிலங்கள் வரை தாக்குமா என்பது ஒரு யூக விளையாட்டுதான். ஆனால் நிச்சயமாக இந்த மாநிலங்களின் தேர்தல்களில் இது பேசுபொருளாக இருக்கும் என்பதில் சந்தேகமே இல்லை.

காங்கிரஸைச் சார்ந்த கேப்டன் அமரிந்தர் சிங் தனது சுயபலத்தின் அடிப்படையிலே தலைவர்தான். எனினும் பஞ்சாபில் சுவைத்த வெற்றியின் செல்வாக்கை மேலும் பல இடங்களில் பயன்படுத்திக் கொள்வதில் அந்தப் பழம்பெரும் கட்சிக்குச் சவால்கள் உண்டு. உள்ளாட்சித் தேர்தல்கள் நடக்க இருக்கும் குஜராத் அந்தக் கட்சிக்கு சவாலான, கடினமான பிரதேசம். அங்கே காங்கிரஸ் பாஜகவுக்கு எதிராக கடுமையாகப் போராடினாலும், அதன் வெற்றி வாய்ப்பு என்பது பெரும் சிரமங்களுக்கும், போராட்டத்திற்கும் அப்புறம்தான் சாத்தியமாகும்.

இந்தி பேசும் பிரதான பிரதேசங்களில் ஏற்படுத்திய விவசாயிகள் போராட்டத்தின் தாக்கம் இன்னும் ஆய்வு செய்யப்படவில்லை. வரும் நாட்களில் இன்னும் நிறைய போராட்டங்கள் காத்திருக்கின்றன; எல்லாம் அரசின் கொள்கை மாற்றங்கள் சம்பந்தப் பட்டவை. பஞ்சாபின் தேர்தல் முடிவுகள் காங்கிரஸ்க்கு ஊட்டச் சத்தாகுமா? அதன் வெற்றி தேர்தலை எதிர்கொள்ள இருக்கும் மாநிலங்களில் தேர்தல் கணக்கில் மாற்றத்தை ஏற்படுத்துமா என்பதை பொறுத்திருந்துதான் பார்க்க வேண்டும்.

இதையும் படிங்க:கிரண்பேடி ஏற்படுத்திய காயங்களுக்கு மருந்தளிக்கப் போகிறாரா 'டாக்டர்' தமிழிசை?