அதிதீவிர புயலாக அச்சுறுத்தி வந்த நிவர் புயல் சற்று வலு குறைந்து புதுச்சேரியில் நள்ளிரவில் கரையை கடந்தது. அப்போது கனமழையும் கொட்டியது. இதனால் நகரப் பகுதிகளில், சாலைகள் முழுவதும் வெள்ளம் சூழ்ந்து காட்சியளிக்கிறது. குறிப்பாக இந்திரா காந்தி சதுக்கம், புஸ்சி வீதி, கிருஷ்ணா நகர், ரெயின்போ நகர் உள்ளிட்ட சாலைகளில் முழங்கால் அளவிற்கு வெள்ளம் சூழ்ந்துள்ளது.
முக்கிய சாலைகள் அனைத்திலும் மரங்கள் விழந்து கிடப்பதால் போக்குவரத்து பெரிதும் பாதிக்கப்பட்டுள்ளது. அவ்வாறு விழுந்து கிடக்கும் மரங்கள், மின் கம்பங்களை அகற்றும் பணியில் பணியாளர்கள் முழுவீச்சில் ஈடுபட்டுள்ளனர். இந்நிலையில், வெள்ளம் பாதித்துள்ள ரெயின்போ நகர் உள்ளிட்ட பகுதிகளை நேரில் சென்று முதலமைச்சர் நாராயணசாமி இன்று காலை ஆய்வு செய்தார். அப்போது, மழைநீர் புகுந்த வீடுகள், சாலைகளை பார்வையிட்ட அவர், ஜெனரேட்டர் மூலம் துரிதமாக நீரை அகற்றுமாறு பொதுப்பணித்துறையினருக்கு அறிவுறுத்தினார்.