ஜாஷ்பூர்: சத்தீஸ்கர் ஜாஷ்பூர் நகரில் உள்ள பதல்கான் பகுதியில் இன்று (அக். 15) தசரா விழாவின் ஊர்வலம் நடைபெற்றது. அப்போது
அதிவேகத்தில் வந்த கார் ஒன்று கும்பலுக்குள் புகுந்தது. இந்த விபத்தில் 20-க்கும் மேற்பட்டோர் காயமடைந்தனர்.
காரில் கஞ்சா
அவர்கள் அருகில் இருந்த மருத்துவமனைக்கு அழைத்துச் செல்லப்பட்டனர். அதில், சிகிச்சை பெற்றுவந்த நால்வர் உயிரிழந்தனர்.
இந்த சம்பவத்தை அங்கிருந்தவர்கள் பலரும் வீடியோ எடுத்துள்ளனர். மேலும், அங்கிருந்த மக்கள் கோபத்தில் அந்த காரை துரத்தி சென்று, காருக்குத் தீ வைத்தனர். அந்த காரில் அதிகளவில் கஞ்சா இருந்ததாகக் கூறப்படுகிறது.
காவல்துறை - பொதுமக்கள் மோதல்
இந்த சம்பவம் குறித்து நடவடிக்கை எடுக்கக் கோரி ஊர்வலத்தில் இருந்தோர், பதல்கான் காவல் நிலையத்தை முற்றுகையிட்டு, காவலர்களுக்கு எதிராக கோஷமிட்டனர். இதனால், காவலர்களுக்கும், பொதுமக்கள் சிறு மோதல் ஏற்பட்டது. தங்களின் செயல்கள் பதிவாகிவருவதை கண்ட பொதுமக்களின் ஒரு பிரிவினர், செய்தியாளர்களின் கேமராக்களை பறித்தனர்.