பாட்னா (பீகார்): நாடாளுமன்றத் தேர்தலில் பாஜகவைத் தோற்கடிக்க அனைத்து எதிர்கட்சிகளும் ஒன்றுகூடி 'இந்தியா' (I.N.D.I.A) என்ற ஒரு கூட்டணியாகக் களம் காண உள்ளனர். இந்தியா கூட்டணியின் முதல் மூன்று கூட்டங்கள் வெற்றிகரமாக நடைபெற்ற நிலையில் கடந்த 19ஆம் தேதி டெல்லியில் நான்காவது கூட்டம் நடைபெற்றது.
இந்தக் கூட்டத்தில் பிரதமர் வேட்பாளர் மற்றும் சீட் பகிர்வு போன்ற முக்கிய முடிவுகள் எடுக்கப்படும் என எதிர்பார்க்கப்பட்டிருந்தது. முன்னதாக ஐந்து மாநிலத் தேர்தல் முடியும் வரை இந்தியா கூட்டணி கூட்டத்தில் காங்கிரஸ் பெருமளவில் தலையீடு செலுத்தாமல் இருந்து வந்தது இந்தியா கூட்டணித் தலைவர்களிடையே அதிருப்தியை ஏற்படுத்தியது.
இந்த நிலையில் தற்போது மீண்டும் இந்தியா கூட்டணியில் காங்கிரஸ் முனைப்புக் காட்டி வருகிறது. கடந்த 19ஆம் தேதி டெல்லியில் நடைபெற்ற கூட்டத்தில் கூட்டணியிலிருக்கும் அனைத்து தலைவர்களும் கலந்து கொண்டனர். கூட்டத்தில் பிரதமர் வேட்பாளர் மற்றும் சீட் பகிர்வு குறித்த விவாதத்தில், காங்கிரஸ் தலைவர் மல்லிகார்ஜுன கார்கே பிரதமர் வேட்பாளராக அறிவிக்க சில தலைவர்கள் ஆதரவுத் தெரிவித்து இருந்தனர். ஆனால் முதலில் வெற்றி பின்னரே வேட்பாளர் தீர்மானம் என மல்லிகார்ஜுன கார்கே தட்டிக்களித்ததாகக் கூறப்படுகிறது.
இந்த விவாதத்தில் பீகார் முதலமைச்சரும் ஐக்கிய ஜனதா தளத்தின் தலைவருமான நிதீஷ் குமார் கோபமடைந்ததாகத் தகவல்கள் வெளியாகின. ஆனால் தற்போது இந்த கருத்துக்கள் முற்றிலும் தவறான கருத்து என மறுத்து, வரும் நாடாளுமன்றத் தேர்தலில் இந்தியா கூட்டணியும் ஐக்கிய ஜனதா தளமும் ஒன்றிணைந்து செயல்படும் என நிதீஷ் குமார் உறுதியளித்துள்ளார்.