சரிந்த ஜி.டி.பி விகிதம் : சி.எஸ்.ஓ அறிக்கையை சுட்டிக்காட்டி வேதனை தெரிவித்த ப.சிதம்பரம்

டெல்லி: 2020-21 நிதியாண்டின் முதல் காலாண்டில் நாட்டின் மொத்த உள்நாட்டு உற்பத்தி 23.9 % சரிந்துள்ள அவமானகரமான செய்தி தொடர்பில் பிரதமர் வாய்திறக்கப் போவதில்லை என காங்கிரஸ் கட்சியின் மூத்த தலைவர் ப.சிதம்பரம் கருத்து தெரிவித்துள்ளார்.

ஜி.டி.பி விகிதம் சரிவை சந்தித்திருப்பதை சுட்டிக்காட்டி சி.எஸ்.ஓ வெளியிட்டுள்ள புள்ளிவிவரம் நாடு முழுவதும் மிகப் பெரிய அதிர்ச்சியை ஏற்படுத்தியுள்ளது.

இது தொடர்பாக இன்று மெய்நிகர் பத்திரிகையாளர் சந்திப்பில் கருத்து தெரிவித்த அவர் "பொருளாதார வீழ்ச்சியிலிருந்து நாட்டை மீட்டு மீண்டும் சாதகமான வளர்ச்சியைப் பதிவு செய்வதற்கு பல மாதங்கள் ஆகும். மத்திய பாஜக அரசின் செயலற்ற தன்மையும், நிர்வாக திறன் இன்மையும் அதற்கான வாய்ப்பு இருப்பதாக நம்பிக்கை அளிக்கவில்லை.

ஏப்ரல்-ஜூன் 2020 காலாண்டிற்கான மொத்த உள்நாட்டு உற்பத்தி குறித்து சி.எஸ்.ஓ வெளியிட்டுள்ள தற்காலிக மதிப்பீடுகள் மூலமாக நாட்டு மக்களுக்கு இந்த அரசின் தவறான பொருளாதாரக் கொள்கை வெட்டவெளிச்சமாகி உள்ளது.

முதல் காலாண்டில் மொத்த உள்நாட்டு உற்பத்தி 23.9 % குறைந்துள்ளது. அதே போல, 2019-2020 ஆம் ஆண்டின் முடிவில் மொத்த உள்நாட்டு உற்பத்தி சுமார் 20% குறைந்துள்ளது என்பதையும் நாம் அறியலாம்.

பொருளாதார வீழ்ச்சிக்கு ஒரு 'கடவுளின் செயல்' என்று குற்றம் சாட்டிய நிதி அமைச்சர் விவசாயிகளுக்கும் விவசாயிகளை ஆசீர்வதித்த கடவுள்களுக்கும் நன்றியுடன் இருக்க வேண்டும். காரணம், நாட்டின் விவசாயத்துறை, வனத்துறை மற்றும் மீன்பிடித்துறை மட்டுமே 3.4% வளர்ச்சியை சந்தித்துள்ளது. பொருளாதாரத்தின் மற்ற ஒவ்வொரு துறையும் கடுமையாக வீழ்ச்சியடைந்துள்ளது.

சி.எஸ்.ஓவின் இந்த மதிப்பீடுகள் எங்களுக்கு ஆச்சரியமாக இல்லை. முதல் காலாண்டின் சில நாள்களில் வளர்ச்சிக்கான சில அறிகுறிகளை கண்ட அரசாக இருந்தால்தான் ஆச்சரியப்பட வேண்டும்.

நாட்டின் பொருளாதார சாதகபாதகங்களை அறியாமல், பொருத்தமான நிதி மற்றும் நலன்புரி நடவடிக்கைகளை மேற்கொள்ளாமல் எதையும் மாற்ற முடியாது என்பதை அரசு உணர வேண்டும். ஆனால் அது குறித்து மோடி அரசிற்கு எந்த திட்டமும் இல்லை. வீழ்ச்சியைக் கண்டு அவமானமும் இல்லை.

இந்திய ரிசர்வ் வங்கி அறிக்கைகள், பொருளாதார வல்லுநர்களின் கருத்துகள், காங்கிரஸ் உள்ளிட்ட எதிர்க்கட்சிகளின் ஆலோசனைகள் என எதையும் அவர்கள் கேட்கவில்லை.

நாங்கள் அரசை எச்சரித்தோம், தடுப்பு மற்றும் முன்கூட்டியே நடவடிக்கைகளை எடுக்குமாறு வலியுறுத்தினோம். எங்கள் வேண்டுகோள் யாவும் காதுகேளாதவர் காதில் விழுந்த கதைகளாகிப் போயின. இவை அனைத்தும் எதிர்பார்க்கப்பட்டவைதான். ஒட்டுமொத்த நாடும் தற்போது பெரும் விலையைக் கொடுத்திருக்கிறது.

ஏழைகளும் பாதிக்கப்படக்கூடியவர்களும் விரக்தியில் உள்ளனர். மோடி அரசு மட்டுமே அது குறித்த எவ்வித அக்கறையற்றதாகவே தொடர்கிறது" என்றார்.