இந்தியா-அமெரிக்க இடையே நாளை நடைபெறும் 2+2 அமைச்சர்கள் பேச்சுவார்த்தையில் கலந்துகொள்ள அமெரிக்க வெளியுறவுத்துறை அமைச்சர் மைக்கேல் பாம்பியோ, அந்நாட்டின் பாதுகாப்புத் துறை அமைச்சர் மார்க் எஸ்பர் ஆகியோர் இன்று இந்தியா வருகின்றனர்.
டெல்லியில் நாளை நடைபெறும் மூன்றாவது இந்தியா-அமெரிக்க இருநாடுகளின் பாதுகாப்பு, வெளியுறவுத்துறை அமைச்சர்கள் பங்கேற்கும் 2+2 அமைச்சர்கள் உரையாடலில் அவர்கள் பங்கேற்கின்றனர்.
இதில், இந்திய வெளியுறவுத் துறை அமைச்சர் எஸ்.ஜெய்சங்கர், பாதுகாப்புத் துறை அமைச்சர் ராஜ்நாத் சிங் ஆகியோர் கலந்துகொள்கின்றனர்.
இதுதொடர்பாக ட்விட் செய்துள்ள மைக்கேல் பாம்பியோ, “ இந்தியா, இலங்கை, மாலத்தீவு மற்றும் இந்தோனேசியா நாடுகளுக்கான எனது பயணத்தை தொடங்கிவிட்டேன்” என்று பதிவிட்டுள்ளார்.
மூன்றாவது 2+2 உரையாடலை நடத்துவது ராஜதந்திர, பாதுகாப்பு நோக்கங்களுக்கான இந்தியா-அமெரிக்காவின் உறுதிப்பாட்டை நிருபிக்கிறது என்று அமெரிக்கா தெரிவித்துள்ளது.
