ஜம்மு காஷ்மீரில் பயங்கரவாதிகளை சுட்டு வீழ்த்திய பாதுகாப்புப் படையினர்

ஸ்ரீநகர் : புல்வாமாவில் நடைபெற்ற மோதல் சம்பவத்தில் இரண்டு பயங்கரவாதிகளை பாதுகாப்புப் படையினர் சுட்டு வீழ்த்தினர்.

ஜம்மு காஷ்மீரில் பயங்கரவாதிகள் தாக்குதல் நடத்துவது தொடர்கதையாகி வருகிறது. இதற்கிடையே, தெற்கு காஷ்மீர் தாதுரா பகுதியில் பயங்கரவாதிகளின் நடமாட்டம் அதிகரித்துள்ளதாக பாதுகாப்புப் படையினருக்கு தகவல் கிடைத்துள்ளது. அதனைத் தொடர்ந்து அவர்கள் தேடுதல் வேட்டை மேற்கொண்டனர்.

அப்போது, தாங்கள் மறைந்திருந்த இடத்தைத் தேடிக் கண்டறிந்து வந்த பாதுகாப்புப் படையினரை நோக்கி பயங்கரவாதிகள் சரமாரியாக சுட்டனர். இதற்கு, ராணுவமும் தக்க பதிலடி அளித்தது. இறுதியில், இந்தத் தாக்குதலில் இரண்டு பயங்கரவாதிகள் சுட்டுக் கொல்லப்பட்டனர். இருப்பினும், தேடுதல் வேட்டையை பாதுகாப்பு படையினர் தொடர்ந்து மேற்கொண்டு வருகின்றனர்.

பயங்கரவாதிகளிடமிருந்த ஆயுதங்கள் பறிமுதல் செய்யப்பட்டுள்ளன. கடைசி 12 மணி நேரத்தில், தெற்கு காஷ்மீரில் மட்டும் இரண்டு என்கவுன்டர் சம்பவம் நடைபெற்றுள்ளது. இதில், குல்கமில் நடைபெற்ற துப்பாக்கிச் சூட்டில் இரண்டு பயங்கரவாதிகள் சுட்டுக் கொல்லப்பட்டது குறிப்பிடத்தக்கது.