மோடி, ட்ரம்ப் இருவருக்கும் ஒரே சித்தாந்தம்தான்: சீதாராம் யெச்சூரி!

புதுச்சேரி: இந்திய பிரதமர் மோடி, அமெரிக்க அதிபர் ட்ரம்ப் இருவருக்கும் ஒரே சித்தாந்தம் என்பதால்தான் அமெரிக்காவில் மோடி பிரசாரம் செய்கிறார் என மார்க்சிஸ்ட் கட்சியின் பொதுச் செயலாளர் சீதாராம் யெச்சூரி பேசியுள்ளார்.

மாநில உரிமைகளும் மக்கள் விரோத மசோதாக்களும் என்ற தலைப்பில் சிறப்பு கருத்தரங்கம் புதுச்சேரி மாநில மார்க்சிஸ்ட் கம்யூனிஸ்ட் கட்சி சார்பில் நடைபெற்றது. புதுச்சேரி கம்பன் கலையரங்கில் நடைபெற்ற இக்கருத்தரங்கில் அகில இந்திய மார்க்சிஸ்ட் கம்யூனிஸ்ட் கட்சி பொதுச்செயலாளர் சீதாராம் யெச்சூரி, டி.கே. ரங்கராஜன் எம்.பி, தமிழ்நாடு சிபிஐஎம் பொதுச்செயலாளர் பாலகிருஷ்ணன் உள்ளிட்ட கட்சி நிர்வாகிகள் கலந்துகொண்டனர்.

இதில் பேசிய சீதாராம் யெச்சூரி, ’பிரதமர் இந்த தேசத்தில் உள்ள மக்களின் நலனைப் பற்றி எந்தக் கவலையும் கொள்ளாமல் அமெரிக்காவில் டொனால்ட் ட்ரம்ப் மீண்டும் ஜனாதிபதியாக வர பிரசாரம் செய்து வருகிறார். மோடி அரசு எவ்வாறு இந்தியாவில் இருக்கிறதோ, அவ்வாறு தான் அமெரிக்காவில் ட்ரம்ப் அரசு உள்ளது.

இந்தியாவில் வெளிநாட்டில் இருந்து யாரும் பிரசாரம் செய்யக்கூடாது. ஆனால் இந்திய பிரதமர் அமெரிக்கா சென்று அங்கு அதிபராக டிரம்ப் மீண்டும் வர வேண்டும் என பிரசாரம் செய்து வருகிறார்.

அமெரிக்க அதிபர் ட்ரம்ப், இந்திய பிரதமர் மோடி இருவருக்கும் ஒரே சித்தாந்தம் என்பதால்தான் அமெரிக்காவில் மோடி பிரசாரம் செய்து வருகிறார்.

இந்தியாவில் மாண்புகளை சீர்குலைக்கும் விதத்தில் மத்திய மோடி தலைமையிலான அரசு கட்டவிழ்த்துவிடக்கூடிய நடவடிக்கைகளை நாம் அனைவரும் ஒன்று சேர்ந்து எதிர்க்க வேண்டிய அவசியத்தில் இருக்கிறோம்’ என்றார்.

இதையும் படிங்க: #howdymodi முத்த மழையில் நனைந்த நரேந்திர மோடி...!