புதுச்சேரி மருத்துவம், பொறியியல், கலை அறிவியல் கல்லூரிகளில் 'சென்ட்க்' எனப்படும் ஒருங்கிணைந்த மாணவர் சேர்க்கை குழு மூலம் ஆண்டுதோறும் மாணவர் சேர்க்கை நடைபெற்று வருகின்றது. இந்தாண்டு 9715 இடங்களுக்கு மாணவர் சேர்க்கை நடைபெற இருக்கிறது. இதில் பொறியியல் படிப்புக்கு 3776, கலை, அறிவியல், வணிகவியல் பாடங்களுக்கு 4923 இடங்களுக்கு மாணவர் சேர்க்கை நடைபெறுகிறது. ஆன்லைன் மூலம் நடைபெறும் இந்த மாணவர் சேர்க்கைக்கு 6 கல்லூரிகள், 72 உயர்நிலைப் பள்ளிகள் மற்றும் 59 மேல்நிலைப் பள்ளிகளில் உதவி மையம் அமைக்கப்பட்டுள்ளன. இங்கு மாணவர்கள் கட்டணமின்றி விண்ணப்பிக்கலாம் என்றும் அறிவிக்கப்பட்டுள்ளது.
இந்நிலையில், இன்று காலை 9 மணிக்கு ஆன்லைன் மூலம் விண்ணப்பிக்கும் முறை தொடங்கும் என்று அறிவிக்கப்பட்டிருந்தது. ஆனால், மதியம் 12 மணி வரை தொடங்கவில்லை. இதனால், மாணவ, மாணவிகள் ஏமாற்றத்துடன் திரும்பி சென்றனர். இது குறித்து மாணவி சங்கீதா கூறுகையில், "கம்ப்யூட்டர் சர்வர் பிரச்னையால் தாமதம் ஏற்பட்டுள்ளது. வேறு மையத்திக்கு சென்று பதிவேற்றம் செய்யுமாறு அலுவலர்கள் கூறினர். காலை முதல் ஆன்லைன் விண்ணப்பிப்பதற்கான காத்திருந்து கடைசியில் ஏமாற்றமே மிஞ்சியது", என்றார்.