ஆந்திராவில் கொரோனா வைரஸ் தாக்கியதாக நினைத்து ஒருவர் தற்கொலை

ஆந்திரா: சித்தூர் அருகே பாலகிருஷ்ணா என்பவர் தான் கொரோனா வைரஸால் பாதிக்கப்பட்டுள்ளதாக நினைத்து தற்கொலை செய்துகொண்ட சம்பவம் சோகத்தை ஏற்படுத்தியுள்ளது.

ஆந்திர மாநிலம், சித்தூர் மாவட்டத்தை அடுத்த எஸ்.என்.கந்திரிகா கிராமத்தில் வசிக்கும் பாலகிருஷ்ணா (50) என்பவர், உடல் பரிசோதனைக்காக திருப்பதியில் உள்ள ஸ்ரீவெங்கடேஸ்வர ராம்நாரயண் ருயா அரசு பொது மருத்துவமனைக்குச் சென்றார். அங்கு அவருக்கு வாயில் தொற்று நோய் இருப்பதாக மருத்துவர்கள் கூறியுள்ளனர்.

இதை அவர் வீட்டில் உள்ள நபர்களிடம் தெரிவித்துள்ளார். ஆனால், அவரது குடும்ப உறுப்பினர்கள் 'வாயில் தொற்று நோய் வந்ததற்கு கொரோனா வைரஸ் தான் காரணம்' எனக் கூறி, பாலகிருஷ்ணாவை தொடாமல் இருந்துள்ளனர். இதனால் கவலையடைந்த அவர் தனது விவசாய நிலத்தில் உள்ள மரத்தில், தூக்கிட்டுத் தற்கொலை செய்து கொண்டார். இதுகுறித்து தகவலறிந்த பாலகிருஷ்ணாவின் உறவினர்கள், அவரது உடலை எடுத்துச் சென்று நல்லடக்கம் செய்தனர்.

பின்னர் இச்சம்பவம் அறிந்து வந்த காவல் துறையினர் பாலகிருஷ்ணாவைப் பற்றி உறவினர்களிடம் கேட்டபோது, "அவர் தனக்கு கொரோனா வைரஸ் இருப்பதாக நினைத்து, தற்கொலை செய்து கொண்டதாகவும், பின்னர் நாங்கள் அவரது உடலை நல்லடக்கம் செய்துவிட்டதாகவும்" தெரிவித்துள்ளனர்.

இதனையடுத்து காவல் துறையினர் பாலகிருஷ்ணா உயிரிழப்பிற்கு வேறு ஏதேனும் காரணம் உள்ளதா? என அவரது குடும்பத்தினரிடம் விசாரணை மேற்கொண்டு வருகின்றனர்.

இதையும் படிங்க: கொரோனா வைரஸ் நடத்திய கொடூரத் தாக்குதல்! - சிறப்புக் கட்டுரை