நரசிம்ம ராவின் நூற்றாண்டு விழா தொடக்கம் - காங்கிரஸ் தலைவர்கள் வாழ்த்து!

டெல்லி: நவீன இந்தியாவை வடிவமைப்பதில் முக்கியப் பங்காற்றிய இந்தியாவின் முன்னாள் பிரதமர் பி.வி. நரசிம்ம ராவின் நூற்றாண்டை கொண்டாட உள்ள தெலங்கானா காங்கிரஸ் கமிட்டிக்கு அகில இந்திய காங்கிரஸ் கமிட்டித் தலைவர்கள் சோனியா காந்தி, ராகுல் காந்தி ஆகியோர் வாழ்த்துகள் தெரிவித்துள்ளனர்.

முன்னாள் பிரதமர் பி.வி. நரசிம்மராவின் நூற்றாண்டு விழாவை, ஆண்டு முழுவதும் கொண்டாடுவதற்கான ஏற்பாடுகளை தெலுங்கானா காங்கிரஸ் கமிட்டி அறிவித்துள்ளது.

இது தொடர்பாக காங்கிரஸ் கமிட்டியின் இடைக்காலத் தலைவர் சோனியா காந்தி வெளியிட்டுள்ள செய்திக் குறிப்பில், "அமரர் நரசிம்ம ராவின் நூற்றாண்டு விழா கொண்டாட்டம் என்பது நாட்டிற்காக உழைத்த மிக அறிவார்ந்த ஆளுமையை நினைவுகூர்ந்து, அவரது உழைப்பிற்கு நன்றி செலுத்த நமக்கு கிடைத்த ஒரு சந்தர்ப்பமாகும்.

அவர் மாநில மற்றும் தேசிய அரசியலில் நீண்ட கால கடும் உழைப்பை செலுத்தி அனுபவம் பெற்றத் தலைவராவார்.

கடுமையான பொருளாதார நெருக்கடியை தேசம் எதிர்க்கொண்டபோது அவர் இந்தியாவின் பிரதமரானார். அவரது தைரியமான தலைமையின் மூலம், நம் நாடு பல சவால்களை வெற்றிகரமாக சமாளிக்க முடிந்தது. ஜூலை 24, 1991 ஆம் தேதி மத்திய பட்ஜெட், நமது நாட்டின் பொருளாதாரத்தையே மாற்றியமைத்தது. ராவின் பதவிக்காலம் பல அரசியல், சமூக மற்றும் வெளியுறவுக் கொள்கை சாதனைகளால் குறிக்கப்படுகிறது என்றால் மிகையல்ல. அவர் ஒரு அப்பழுக்கற்ற காங்கிரஸ்காரர். இந்த ஆண்டு முழுவதும் அவரைப் போற்றும் வகையில் கொண்டாட்டங்களை ஏற்பாடு செய்ததற்காக தெலுங்கானா காங்கிரஸ் கமிட்டியை நான் வாழ்த்துகிறேன். பி.வி. நரசிம்மராவ் மிகவும் மதிப்பிற்குரிய தேசிய மற்றும் சர்வதேச பிரமுகர். காங்கிரஸ் கட்சி அவரது பல சாதனைகள் மற்றும் பங்களிப்புகளில் பெருமை கொள்கிறது" என தெரிவித்தார்.

நரசிம்ம ராவின் நூற்றாண்டு விழாவை குறித்து ராகுல் காந்தி வெளியிட்டுள்ள குறிப்பில், "நவீன இந்தியாவை வடிவமைத்த ஒரு மனிதரை, அவரது உழைப்பை நாம் கொண்டாட உள்ளோம். அவரது பால்ய வயதில் காங்கிரஸ் கட்சியில் சேர்ந்ததில் இருந்து மிகப்பெரிய ஜனநாயகத்தின் பிரதமராகும் வரை அவரது அரசியல் பயணம் நாட்டிற்கு பல விடயங்களை எடுத்துரைக்கிறது. அவரது மன உறுதியையும் உறுதியையும் அந்த பயணம் பிரதிபலிக்கிறது.

ஜூலை 24, 1991 வரவுசெலவுத் திட்டத்தின் 29ஆவது ஆண்டு நிறைவைக் குறிக்கிறது. இந்த நாளில், இந்தியா பொருளாதார மாற்றத்திற்கான ஒரு தைரியமான புதிய பாதையைத் தேர்ந்தெடுத்தது. தாராளமயமாக்கல் சகாப்தத்தை முன்னெடுத்ததில் ராவ் மற்றும் டாக்டர் மன்மோகன் சிங் முக்கிய பங்கு வகித்தனர் என்பதை நாட்டிற்கு நினைவுக் கூறும்.

இந்த நிகழ்வு இந்தியாவின் வளர்ச்சிக் கதையைப் பற்றியும் அதை சாத்தியமாக்கிய குறிப்பிடத்தக்க நபர்களைப் பற்றியும் நமது இளைஞர்களிடையே அறியத்தரும், அறியும் ஆர்வத்தைத் தூண்டும்" என நம்பிக்கை தெரிவித்தார்.

காங்கிரஸ் கட்சியின் சாதாரண உறுப்பினராக அரசியலில் தனது வாழ்க்கையைத் தொடங்கிய நரசிம்ம ராவ், 1957 ஆம் ஆண்டு முதல் 1977 ஆம் ஆண்டுவரை 20 ஆண்டுகள் ஆந்திரப்பிரதேச சட்டப்பேரவை உறுப்பினராக பதவி வகித்தார். 1962 முதல் 1970 வரை 8 ஆண்டு காலம் ஆந்திரப்பிரதேச சட்டப்பேரவையில் பல்வேறு அமைச்சகங்களை அமைச்சராகக் கையாண்டார். அதன் பிறகு 1971 ஆம் ஆண்டில் ஆந்திரப் பிரதேசத்தின் முதலமைச்சராக பொறுப்பேற்றார்.

1972 ஆம் ஆண்டில் நாடாளுமன்ற உறுப்பினராக தேர்ந்தெடுக்கப்பட்ட பின்னர் தேசிய அரசியலில் நுழைந்தார். இந்திரா காந்தி மற்றும் ராஜீவ் காந்தி இருவரின் அமைச்சரவையிலும் உள்துறை, பாதுகாப்பு மற்றும் வெளியுறவு உள்ளிட்ட பல முக்கிய அமைச்சகங்களை அவர் வழிநடத்தினார்.

ராஜிவ் காந்தியின் மரணத்தைத் தொடர்ந்து 1991ஆம் ஆண்டில் அவர் நாட்டின் பிரதமரானார். நரசிம்ம ராவ் தென்னிந்தியாவைச் சேர்ந்த முதல் பிரதமர் (1991-1996) என்பது கவனிக்கத்தக்கது.

உடல் நலம் குன்றிய நிலையில், 2004 டிசம்பர் 9 ஆம் தேதி மாரடைப்பால் டெல்லி எய்ம்ஸ் மருத்துவமனையில் மரணித்தார். இந்திய முன்னாள் பிரதமரான அவரது உடலை, மற்ற முன்னாள் பிரதமர்களைப் போல புது டெல்லியில் நல்லடக்கம் செய்ய அவரது குடும்பத்தினர் விரும்பினர். அந்த கோரிக்கை அன்றைக்கு ஏற்கப்படவில்லை.

காங்கிரஸ் கமிட்டி தலைமையகத்தில் இராணுவ வண்டியில் உடலைக் கொண்டுச் செல்லக்கூட அனுமதிக்கப்படாமல், அகில இந்திய காங்கிரஸ் கமிட்டியின் அலுவலகத்தில் நுழைய மறுக்கப்பட்டு அதன் கேட் பூட்டப்பட்டதால் வாசலிலேயே அவருடைய உடலுக்கு ஒப்புக்கு மரியாதை செலுத்தப்பட்டது. பின்னர் அவரது உடல் ஹைதராபாத் எடுத்து செல்லப்பட்டு, அங்கு ஜூப்ளி மண்டபத்தில் இறுதிச்சடங்குக்கு முன் பார்வைக்கு வைக்கப்பட்டது. அங்கு அவரது உடல் அரசு மரியாதையோடு தகனம் செய்யப்பட்டது கவனிக்கத்தக்கது.