'விரைவில் கொல்கத்தா வந்தடைவோம்'- ஆர்ப்பரிக்கும் சிவசேனா!

விரைவில் கொல்கத்தாவை வந்தடைவோம் என சிவசேனா எம்பியும் அக்கட்சியின் மூத்தத் தலைவருமான சஞ்சய் ராவத் தெரிவித்துள்ளார்.

மும்பை: மேற்கு வங்க சட்டப்பேரவை தேர்தலில் சிவசேனா போட்டியிடுகிறது.

மகாராஷ்டிரா முதலமைச்சர் உத்தவ் தாக்கரே தலைமையிலான சிவசேனா கட்சி, மேற்கு வங்க சட்டப்பேரவை தேர்தலில் போட்டியிடும் என அக்கட்சியின் மூத்தத் தலைவரும் எம்பியுமான சஞ்சய் ராவத் ஞாயிற்றுக்கிழமை (ஜன.17) அறிவித்தார்.

இது குறித்து அவர் ட்விட்டரில், “இது அனைவராலும் எதிர்பார்க்கப்பட்ட செய்தி. மேற்கு வங்க சட்டப்பேரவை தேர்தலில் சிவசேனா போட்டியிடுகிறது. தலைவர் உத்தவ் தாக்கரே உடன் நடந்த சந்திப்புக்கு பின்னர் இந்த முடிவு எடுக்கப்பட்டுள்ளது. நாங்கள் கொல்கத்தாவை விரைவில் வந்தடைவோம். ஜெய் ஹிந்த்.” எனத் தெரிவித்துள்ளார்.

மேற்கு வங்கத்தில் மம்தா பானர்ஜி தலைமையிலான திரிணாமுல் காங்கிரஸ் ஆட்சி நடைபெற்றுவருகிறது. இந்த அரசின் பதவிக்காலம் மே மாதம் 30 ஆம் தேதியுடன் நிறைவடைகிறது.

இதையடுத்து 294 சட்டப்பேரவை தொகுதிகள் கொண்ட அங்கு ஏப்ரல்-மே மாதங்களில் தேர்தல் நடைபெறவுள்ளது. அங்கு ஆட்சியை கைப்பற்ற பாஜக மும்முரம் காட்டிவருகிறது. இந்நிலையில் தற்போது கோதாவில் பாஜகவின் முன்னாள் கூட்டாளியான சிவசேனாவும் களமிறங்க உள்ளது குறிப்பிடத்தக்கது.

இதையும் படிங்க: பறவைக் காய்ச்சல் பின்னணியிலும் பாகிஸ்தானா? பாஜகவை பங்கம் செய்யும் சிவசேனா!