பிகார் தேர்தல் : லோக் ஜனசக்தியில் இணைந்த பாஜக மூத்த தலைவர்!

பாரதிய ஜனதா கட்சியின் மூத்த தலைவர்களுள் ஒருவரான உஷா வித்யார்த்தி, லோக் ஜனசக்தி கட்சியில் இன்று இணைந்த நிலையில், பிகாரை முன்னெடுத்துச் செல்ல இதுபோன்ற சில கடுமையான முடிவுகள் தேவைப்படுவதாகத் தெரிவித்துள்ளார்.

பாரதிய ஜனதா கட்சியின் மூத்த தலைவர்களுள் ஒருவரான உஷா வித்யார்த்தி, லோக் ஜனசக்தி கட்சியில் (எல்ஜேபி) இன்று (அக்.07) இணைந்தார்.

லோக் ஜனசக்தி கட்சியின் தேசியத் தலைவரும், நாடாளுமன்ற உறுப்பினருமான சிராக் பாஸ்வான் முன்னிலையில் உஷா வித்யார்த்தி அக்கட்சியில் இணைந்தார். வரும் பிகார் சட்டப்பேரவைத் தேர்தலில், அவர் பாலிகஞ்ச் தொகுதியில் போட்டியிடலாம் என எதிர்ப்பார்க்கப்படுகிறது.

இந்நிலையில், ”தேசிய ஜனநாயகக் கூட்டணியிலிருந்து பிரிந்த பின்னர், லோக் ஜனசக்தி கட்சி பிகார் சட்டமன்றத் தேர்தலில் தனித்துப் போட்டியிடுகிறது. இதுவே சரியான முடிவு. பிகாரை முன்னெடுத்துச் செல்ல விரும்பும் சிராகின் பார்வை சிறப்பானது. இக்காரணத்திற்காக இதுபோன்ற சில கடுமையான முடிவுகள் தேவைப்படுகின்றன” என வித்யார்த்தி தெரிவித்துள்ளார்.

பிகார் தேசிய ஜனநாயகக் கூட்டணியிலிருந்து கடந்த அக்டோபர் 4ஆம் தேதி லோக் ஜனசக்தி கட்சி பிரிந்த நிலையில், வருகிற பிகார் சட்டப்பேரவைத் தேர்தலில் 143 இடங்களில் போட்டியிடுகிறது. இருப்பினும், மத்தியில் இன்னும் தேசிய ஜனநாயகக் கூட்டணியில்தான் அக்கட்சி அங்கம் வகிக்கிறது.

நேற்று (அக்.06) பிகார் பாஜகவின் வலுவான தலைவர்களுள் ஒருவரான ராஜேந்திர சிங் எல்ஜேபியில் இணைந்த நிலையில், வரும் காலங்களில்ஐக்கிய ஜனதா தளம், பாஜகவின் பல தலைவர்களும்லோக் ஜனசக்தியில் இணையலாம் என்றும் யூகிக்கப்படுகிறது.

லோக் ஜனசக்தி தலைவர் ராம் விலாஸ் பாஸ்வான், மத்திய அரசில் அமைச்சராக தொடர்வார் என்றும் தெரிவிக்கப்பட்டுள்ளது. பிகார் தேசிய ஜனநாயகக் கூட்டணியில் தற்போது ஐக்கிய ஜனதா தளம், பாஜக, இந்துஸ்தானி அவாம் மோர்ச்சா, விகாஷீல் இன்சான் ஆகிய கட்சிகள் உள்ளன.

இதில், 122 இடங்களில் ஐக்கிய ஜனதா தளம் கட்சியும், 121 இடங்களில் பாஜகவும் போட்டியிடுகின்றன. இதில் தான் போட்டியிடும் 122 இடங்களிலிருந்து ஏழு இடங்களை ஹிந்துஸ்தானி அவாம் மோர்ச்சா கட்சிக்கு ஐக்கிய ஜனதா தளம் ஒதுக்கியுள்ளது.

பாஜக, வளர்ந்து வரும் கட்சியான ஐஎன்எஸ் கட்சிக்கு சில இடங்களை வழங்கும் என எதிர்ப்பார்க்கப்படுகிறது.