சிஏஏவை எதிர்த்து மேலும் ஒரு வழக்கு - உள்துறை அமைச்சகம் பதிலளிக்க நீதிமன்றம் உத்தரவு

டெல்லி: குடியுரிமை திருத்தச் சட்டதை எதிர்த்து மேற்கு வங்கத்தை சேர்ந்தவர்கள் தொடுத்துள்ள வழக்கில், உள்துறை அமைச்சகம் பதிலளிக்க உச்ச நீதிமன்றம் உத்தரவிட்டுள்ளது.

மேற்கு வங்கத்தின் பூர்பா பர்தாமன் பகுதியில் வசிக்கும் இஸ்ரருல் ஹோக் மொண்டால் உட்பட 20 பேர் குடியுரிமை திருத்தச் சட்டத்துக்கு எதிராக உச்ச நீதிமன்றத்தில் மனுத் தாக்கல் செய்தனர்.

அதில், தற்போது நிறைவேற்றப்பட்டுள்ள குடியுரிமை திருத்தச் சட்டம், அடிப்படை உரிமைகளை உறுதிசெய்யும் 14,19,21 ஆகிய சட்டப் பிரிவுகளுக்கு எதிராகவுள்ளதாக கூறப்பட்டிருந்தது. மேலும், குடியுரிமை திருத்தச் சட்டம் தொடர்பாக உள்துறை அமைச்சகம் வெளியிட்டுள்ள சுற்றறிக்கை, அரசியலமைப்பை மீறும் வகையில் உள்ளதாகவும், இச்சட்டம் நாட்டின் அடிப்படையான மதச்சார்பின்மை, சமத்துவம் ஆகியவற்றை குலைக்கும் வகையில் உள்ளதாகவும் தெரிவிக்கப்பட்டிருந்தது.

உச்ச நீதிமன்ற தலைமை நீதிபதி எஸ்.ஏ.போப்டே, நீதிபதிகள் பி.ஆர்.கவாய், சூர்யா காந்த் ஆகியோர் அடங்கிய அமர்வு முன்பு இந்த மனு விசாரணைக்கு வந்தது. இந்த மனு தொடர்பாக பதிலளிக்க உள்துறை, சட்டத்துறை, வெளியுறவுத்துறை அமைச்சகங்களுக்கு நோட்டீஸ் அனுப்ப நீதிபதிகள் உத்தரவிட்டனர்.

மேலும், குடியுரிமை திருத்தச் சட்டம் தொடர்பான மற்ற வழக்குகளுடன் ஜனவரி 22ஆம் தேதி இந்த வழக்கும் விசாரணைக்கு எடுத்துக்கொள்ளப்படும் என்று தெரிவித்தனர்.

இதையும் படிங்க: நிர்பயா வழக்கு: உச்ச நீதிமன்றத்தில் பவன் குமார் குப்தா புதிய மனு!