மோடி உருவபொம்மையைக் கொளுத்த முயற்சி

புதுச்சேரி: ஸ்டேட் பாங்க் ஆப் இந்தியா நடத்திய பணியாளர் தேர்வில் உயர் சாதியினருக்கு வழங்கிய இட ஒதுக்கீட்டுக்கு எதிர்ப்பு தெரிவித்து மோடி உருவ பொம்மையை கொளுத்த முயன்ற புதுச்சேரி தந்தை பெரியார் திக அமைப்பினரை காவல் துறையினர் கைது செய்தனர்.

பொதுப்பிரிவில் பின்தங்கியோருக்கு 10 சதவீத இட ஒதுக்கீட்டை மத்திய அரசு அமல்படுத்தியது. இதற்கு பல தரப்பிலிருந்தும் எதிர்ப்பலை எழுந்தது. இந்நிலையில், ஸ்டேட் பாங்க் ஆஃப் இந்தியா நடத்திய பணியாளர் தேர்வில் 10 சதவீத இட ஒதுக்கீடு பயனாளிகளுக்கு 28.5 கட்-ஆஃப் மதிப்பெண்ணும், மற்றவர்களுக்கு 50 , 60 என கட்-ஆப் மதிப்பெண்ணும் வைக்கப்பட்டுள்ளது.

இதனை எதிர்த்து புதுச்சேரி தந்தை பெரியார் திக அமைப்பினர் ஸ்டேட் பேங்க் ஆஃப் இந்தியாவையும், மத்திய அரசையும் கண்டித்து புதுச்சேரியில் உள்ள எஸ்பிஐ பிரதான கிளையை முற்றுகையிட்டு போராட்டம் நடத்தினர்.

அமைப்புத் தலைவர் வீரமோகன் தலைமையில் நடைபெற்ற இப்போராட்டத்தில், மோடி உருவபொம்மையைக் கொளுத்த முயன்றனர். அப்போது காவல்துறையினருக்கும், போராட்டக்காரர்களுக்கும் இடையே மோதல் ஏற்பட்டதால், 50க்கும் மேற்பட்டோரை காவல் துறையினர் கைது செய்தனர்.

.